ސަރުކާރު ސިޔާސީ މަގާމުތަކުގައި ތިބި މީހުންގެ އަދަދު މަދުކުރުމުގެ މަސައްކަތް ފަށައިފިއެވެ.
މައުލޫމާތު ލިބިފައިވާ ގޮތުގައި މިނިސްޓްރީތަކުގައި ތިބި ސިޔާސީ މުވައްޒަފުންގެ ތެރެއިން އެކަށީގެންވާ ފެންވަރެއްގައި މަސައްކަތް ނުކުރާ ފަރާތްތަކުގެ ލިސްޓެއް ފޮނުވުމަށް ކޮންމެ މިނިސްޓްރީއަކަށް ރައީސް އޮފީހުން ވަނީ އަންގާފައެވެ. އަދި ބައެއް މިނިސްޓްރީތަކުން މި ލިސްޓް ރައިސް އޮފީހަށް މިހާރު ފޮނުވާފައިވާ ކަމަށް މައުލޫމާތުލިބެއެވެ.
އެނގިފައިވާ ގޮތުގައި ސަރުކާރުން ސިޔާސީ މަގާމުތަކުގައި ތިބި ފަރާތްތަކަށް ބަދަލުގެންނަން ވަނީ ފަށާފައެވެ. އެގޮތުން ސިޔާސީ މަގާމުތަކުގައި ތިބި ބައެއް ފަރާތްތައް އައްޔަނު ކޮށްފައިތިބި މިނިސްޓްރީތައް ބަދަލުކޮށް، ބައެއް މީހުން މިނިސްޓްރީތަކުން ވަކިކޮށް ކުންފުނިތަކަށް ބަދަލުކޮށްފައިވާއިރު ބައެއް ފަރާތްތައް އަންނަނީ މަގާމުތަކުން ވަކި ކުރަމުންނެވެ.
ރައީސް ޑރ. މުހައްމަދު މުއިއްޒުގެ ސަރުކާރުގައި ސިޔާސީ މަޤާމުތަކުގެ އަދަދު 700 އަށް ވުރެ އިތުރު ނުކުރާނެ ކަމަށް ރިޔާސީ އިންތިހާބުގެ ތެރޭގައި ފާހަގަ ކޮށްފައިވެއެވެ. އެހެންނަމަވެސް މި ސަރުކާރުގައި ސިޔާސީ މަގާމުތަކަށް ގިނަ ބަޔަކު އައްޔަނުކޮށްފައިވާކަމަށް އިދިކޮޅު ޕާޓީތަކުން ތުހުމަތު ކުރެއެވެ.