މަސްވެރިންނަށް ދައްކަންޖެހޭ ފައިސާ ދައްކާ ޚަލާސް ކުރުމަށް އެމްޑީޕީގެ ރައީސް އަބްދުﷲ ޝާހިދު ސަރުކާރަށް ގޮވާލައިފިއެވެ.
އައްޑޫގެ މަސްވެރިންނަށް ފާއިތުވި ދެ މަހު ލިބެން ޖެހޭ ފައިސާ ލިބުން ލަސްވެގެން ހުކުރު ދުވަހުން ފެށިގެން ހުޅުމީދޫގައި ހުންނަ މިފްކޯގެ ފިޝަރީޒް ކޮމްޕްޕެލްސްގައި މަސްވެރިން އަންނަނީ މުޒާހަރާ ކުރަމުންނެވެ.
މިކަމާ ގުޅިގެން އެމްޑީޕީގެ ރައީސް ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ، ބަޔަކުއަތުން އެއްޗެއް ގަނެފިނަމަ އެއެއްޗެއްގެ އަގު އަދާކުރުމަކީ ގަންނަ ބައެއްގެ ވާޖިބެއް ކަމަށާއި އެއީ އެއެއްޗެއް ގަންނަ ބައެއްގެ ހެޔޮކަމުން ނުވަތަ ދީލަތިކަމުން ކުރަންޖެހޭކަމެއް ނޫން ކަމަށެވެ.
"މަސްވެރިންގެ އަތުން ސަރުކާރުން މަސްގަނެފައި ފައިސާ ނުދައްކާނަމަ އެއީ ގޯހެއް. އޭގައި ދެއްކޭނެ ބަހަނާއެއް ނެތް." ޝާހިދު ވިދާޅުވިއެވެ.
ޝާހިދު ވަނީ އައްޑޫ މަސްވެެރިންނާއި އެހެނިހެން މަސްވެރިން އަތުން ގަނެފައިވާ މަހަށް ނުދައްކާހުރި ފައިސާ ދައްކާ ޚަލާސް ކުރުމަށް ސަރުކާރަށް ގޮވާލާފައެވެ.
އައްޑޫގެ މަސްވެރިން ކުރަމުން އަންނަ އިހުތިޖާޖުގައި މަސްވެރިންގެ އެންމެ ބޮޑު ޑިމާންޑަކީ ފާއިތުވި ދެ މަހާއި 17 ދުވަހުގެ ތެރޭގައި ކިރުވި މަހަށް ލިބެން ޖެހޭ ފައިސާ ވީހާ ވެސް އަވަހަކަށް ދިނުމާއި ކުރިއަށް އޮތް ތަނުގައި ކިރުވާ މަހަށް އެންމެ ލަސްވެގެން 15 ދުވަހުގެ ތެރޭގައި ފައިސާ ލިބޭނެ އިންތިޒާމުތަކެއް ހަމަޖައްސައި ދިނުމެވެ.