އާންމު އިޖުތިމާއީ މިންގަނޑާ ޚިލާފަށް ހެދުން އަޅައިގެން ޓިކްޓޮކް ވީޑިއޯ އާންމުކުރަމުން ދިޔަ މުހައްމަދު ނަބީލް (ޔާޔާ ނަބީލު) ގެ މައްޗަށް ދައުވާ ކުރަން ފޮނުވުމަށް މަޝްވަރާ ކުރަމުންދާކަމަށް ފުލުހުން ބުނެފި އެވެ.
ފުލުހުން ބުނީ އޭނަ ބަންދުގައި ބެހެއްޓުމަށްފަހު މި މަހުގެ 4 ގައި ދޫކޮށްލާފައިވާ ކަމަށެވެ. އަދި މައްސަލައިގެ ތަހުގީގު ނިންމައި ދައުވާކުރަން ފޮނުވުމަށް ޕްރޮސެކިއަ ޖެނެރަލްގެ އޮފީހާއެކު މަޝްވަރާ ކުރެވެމު އަންނަ ކަމަށް ފުލުހުން ބުންޏެވެ.
ފުލުހުން ޔާޔާ ނަބީލް، 39، ހައްޔަރުކުރީ މެއި މަހުގެ ކުރީކޮޅު އެވެ.
އޭނަ ކޯޓުގައި ބުނެފައިވާ ގޮތުގައި ނިވާކަންކުޑަ އަންހެން ހެދުން އަޅައިގެން ސޯޝަލް މީޑިއާގައި ވީޑިއޯ ޝާއިއުކުރަމުން ދިޔައީ ޚިޔާލުފާޅު ކުރުމުގެ މިނިވަންކަމުގެ ދަށުން ކަމަށެވެ.
މީގެ ކުރިން ޔާޔާ ނަބީލް ވަނީ ބަރަހަނާ ފޮޓޯ އާއި ފާޅުކަން ބޮޑު ގޮތެއްގައި އޮރިޔާންކާޑު އުފައްދައި އާންމު ކުރި މައްސަލާގައި އެއް އަހަރާއި އެއް މަހާއި ހަ ދުވަހަށް ޖަލަށް ވެސް ލައިފަ އެވެ.