ވެރިކަންކުރާ މައި ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ) އާ އަލަށް ގުޅުނު މެންބަރުންގެ ފޯމުތައް ރައީސް ޑރ. މުހައްމަދު މުއިއްޒުއަށް އަރުވައިފިއެވެ.
ޕީއެންސީ ހަރުގެ ހުޅުވުމަށް މިރޭ ބޭއްވި ރަސްމިއްޔާތުގައި ޕީއެންސީއާ އަލަށް ގުޅުނު މެންބަރުން ވަނީ އެ ފަރާތްތަކުގެ ފޯމު ރައިސް މުއިއްޒުގެ އަތްޕުޅަށް އަރުވާފައެވެ.
ޕީއެންސީއާ އަލަށް ގުޅުނު މެންބަރުންގެ ތެރޭގައި ސިޔާސީ މަސައްކަތުގައި ހަރަކާތްތެރިވާ ޝަފިއްޔާ ޒުބޭރް، 18 ވަނަ މަޖިލީހުގައި ރައްޔިތުންގެ މަޖިލީހުގެ މެންބަރުކަން ކުރެއްވި އެމްޑީޕީގެ މެންބަރު މުހައްމަދު ނާޒިމް، ލަވަކިޔުންތެރިޔާ އުމަރު ޒާހިރު އަދި ކުޅިވަރު ދާއިރާގައި މަސައްކަތްކުރައްވާ މުހައްމަދު ހާނިމް ފާހަގަކޮށްލެވެއެވެ. މީގެއިތުރުން ހުޅުދޫ ދާއިރާއާއި ހުޅުމާލެ ދާއިރާއިން ޕީއެންސީއާ އަލަށް ގުޅުނު މެންބަރުންގެ ފޯމުތައްވެސް ވަނީ ރައީސްއަށް އަރުވާފައެވެ.
ޕީއެންސީ ހަރުގެ ރަސްމީކޮށް ހުޅުވާދެއްވީ ރައީސް ޑރ. މުހައްމަދު މުއިއްޒުއެވެ. ޕީއެންސީ ހަރުގެ ގާއިމުކޮށްފައިވަނީ އެމްޑީޕީގެ ހަރުގެ އަދި ޑިމޮކްރެޓްސްގެ ހަރުގެ ހިންގި ހ. ވެޔޮވިލާގައެވެ.