ރާއްޖޭގެ މަސްވެރިންނަކީ ސަބްސިޑީއާ ނުލައި އެމީހުން ބާނާ މަހަށް އާމްދަނީ ހޯދާ ބަޔަކަށް މި ސަރުކާރުން ހަދާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
ޕީއެންސީގެ ޖަގަހަ ހުޅުވުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރު ޝިޔާމް ވިދާޅުވި، ކުރީ ސަރުކާރުން ރިޔާސީ އިންތިހާބުތެރޭގައި މަހުގެ އަގު 25 ރުފިޔާއަށް އުފުލި ކަމަށާއި ރައީސް ސޯލިހުގެ ވެރިކަން ނިމުނުއިރުވެސް 25 ރުފިޔާގެ ރޭޓުން މަސްވެރިންނަށް ފައިސާ ދީފައި ނުވާ ކަމަށެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެން މަސްވެރިންނަށް ތެލުގެ ސަބްސިޑީއާއި އައިސްގެ ސަބްސިޑީ ހިމަނައިގެން 933 މިލިއަން ރުފިޔާ މިފްކޯގެ ތެރެއިން ދޫކޮށްފައިވާކަން ޝިޔާމް ފާހަގަ ކުރެއްވިއެވެ.
ބައެއް މަސްވެރިން ބޭނުންވަނީ ސަބްސިޑީގެ ގޮތުގައި މިފްކޯއަށް ފައިސާ ދީގެންވެސް މަސްވެރިންގެ ފައިސާ ހޯދުންކަން ފާހަގަކޮށް މިނިސްޓަރު ޝިޔާމް ވިދާޅުވިީ ރައިސް މުއިއްޒުގެ އަމާޒަކީ ސަބްސިޑީއާ ނުލައި މަސްވެރިން ބާނާ މަހުން އާމްދަނީ ހޯދާ ބަޔަކަށް މަސްވެރިކަމުގެ ސިނާއަތް ހެދުމަށްކަމަށެވެ.
މިފްކޯ އޮތީ 1.6 ބިލިއަން ރުފިޔާ އިން ދަރާފައިކަން ފާހަގަކޮށް މިނިސްޓަރު ޝިޔާން ވިދާޅުވީ ސަރުކާރުން ބޭނުންވަނީ މިފްކޯއަކީ އަމިއްލަ ފައިމައްޗަށް ތެދުވެ އާމްދަނީ ލިބޭ ކުންފުންޏަކަށް ހެދުމަށްކަމަށެވެ.