މާލޭގެ ޖަމީލުދީދީ މިސްކިތުގައި ރޯކޮށްލަން ބަޔަކު މަސައްކަތްކޮށްފި އެވެ.
ސިޓީ ކައުންސިލުން ރޭ ބުނީ މާފަންނު އަލިވާގޭގެ މަގާ ދިމާލުން މިސްކިތުގެ ތަޅުގައި ބަޔަކު ރޯކޮށް، އެ މިސްކިތުގެ ތެރެއަށް ވަންނަ މަސައްކަތްކޮށްފައިވާ ކަމަށެވެ.
ކައުންސިލުން ވަނީ މިކަމާ ގުޅޭ ފޮޓޯ ވެސް ސޯޝަލް މީޑިއާގައި އާންމުކޮށްފަ އެވެ. ފޮޓޯތަކުން ފެންނަ ގޮތުން ތަޅުގައި ރޯކުރަން އުޅުމުން ތަޅު އިނީ އަނދައިފަ އެވެ.
"މިސްކިތްތަކުން ވައްކަންކޮށް ތަކެއްޗަށް ގެއްލުންދީ މިސްކިތުގެ ކަރާމާތް ނަގާލުމަށް މަސައްކަތްކުރާ ފަރާތްތަކާ މެދު ހަރުކަށި ފިޔަވަޅު އަޅަން ޖެހޭ." ކައުންސިލުން ބުންޏެވެ.
ފަހަކަށް އައިސް މާލޭގެ މިސްކިތްތަކުން ވައްކަން ކުރުމުގެ މައްސަލަތައް ވެސް ވަރަށް ގިނަ އެވެ. އެގޮތުން މި ފަހުން އެންމެ ގިނައިން ވަގަށް ނަގާފައި ވަނީ ފަންކާ އެވެ.