އައްޑޫ މަސްވެރިން މިހާރު ކުރަމުން އަންނަ މުޒާހަރާ އަކީ ވަކި ބަޔަކު ރާވައިގެން ކުރާ ކަމެއް ކަމަށާއި އެކަން ބަލައި ނުގަންނާނެ ކަމަށް ވެރިކަން ކުރާ ޕީއެންސީ އަށް ނިސްބަތްވާ ހުޅުދޫ ދާއިރާގެ މެންބަރު މުހައްމަދު ޝާހިދު (ޝާޑު) ވިދާޅުވެއްޖެ އެވެ.
ރޭ މާލޭގައި ޕީއެންސީގެ ހަރުގެ ހުޅުވަން ބޭއްވި ޖަލްސާގައި އޭނަ ވިދާޅުވީ ހުޅުމީދޫގައި ހުންނަ މިފްކޯގެ ފިޝަރީޒް ކޮމްޕްލެކްސްގެ އޮޕަރޭޝަން ހުއްޓުވައި އެތަނުން ކަރަންޓް ކަނޑައި މުވައްޒަފުންނަށް ދަތިވާ ގޮތަށް ކަންކަން ކުރުމަކީ އެއްގޮތަކަށް ބަލައިގަނެވޭނެ ކަމެއް ނޫން ކަމަށެވެ.
ޝާޑު ވިދާޅުވީ މަސްވެރިންނަށް ދޭންް ޖެހޭ ފައިސާ ދޭން މި ސަރުކާރަށް މިވީ ކުރު މުއްދަތުގެ ތެރޭގައި މިހާތަނަށް ވެސް ގިނަ މަސައްކަތްތަކެއްކޮށްފައިވާ ކަމަށާއި މަސްވެރިންނާ ދޭތެރޭ ސަރުކާރުން ދެރަ ގޮތެއް ނުހަދާނެ ކަމަށެވެ.
އެގޮތުން ފާއިތުވި އަށް މަހެއްހާ ދުވަހުގެ ތެރޭގައި މަސްވެރިންނަށް 800 މިލިއަން ރުފިޔާ ދީފައިވާ ކަމަށާއި ބޮޑު އީދު ބަންދު އައުމުގެ ކުރިން ވެސް އައްޑޫ ހިމެނޭހެން މުޅި ރާއްޖޭގެ މަސްވެރިންނަށް މިފްކޯއިން ފައިސާ ދޫކޮށްފައިވާ ކަމަށެވެ.
"ހިތާމަ އަކީ މަސްވެރިންނަށް ލިބިދޭ ހައްގުތަކުގެ ބޭނުން ކޮށްގެން ގާނޫނު އަސާސީއިން ކޮންމެ ރައްޔިތަކަށް ހިޔާލާއި ޝުއޫރު ފާޅުކުރުމުގެ މިނިވަންކަން އޮތީތީވެ ދިޔަ ގޮތަށް ގޮސް މަސްފެކްޓްރީގެ ކަރަންޓު ކަނޑާލީ،: ތިންސަތޭކަ ޓަނު މަސް ރައްކާކޮށްފައި ހުރި ކޮންޓެއިނާއެއް ކަރަންޓު ކަނޑާލީ،" ޝާޑު ވިދާޅުވި އެވެ. "އެތަނުގައި ތިބި ސާޅީހަކަށް މުވައްޒަފުން ކައިބޮއި ހަދާތަނުން ކަރަންޓު ކަނޑާލީ. މިއީއެއް ނޫން އިހުތިޖާޖް ކުރުމަކީ. މިއީ ރޭވިގެން ހިންގާ ނުބައި އަޑި ނޭނގޭ ބަޔަކު އަޑީގައި ތިބެގެން ކުރާ ކަމެއް."
އޭނަ ވިދާޅުވި ގޮތުގައި އައްޑޫގައި މަސްވެރިން ކުރާ ކަމަކީ ބަޔަކު އަޑީގައި ތިބެގެން ހިންގާ ޖަރީމާއެއް ކަމަށެވެ. އަދި މަސްވެރިންގެ އިހުސާސާއި ވިންދު ވަރަށް ރަނގަޅަށް އެނގިވަޑައިގަންނަވާ ކަމަށް ވިދާޅުވި އެވެ.
"ގަބޫލުކުރަން ޖެހޭ ހަގީގަތަކީ ނިމިދިޔަ ސަރުކާރުން ރިޔާސީ އިންތިހާބުގެ ދެވަނަ ބުރުގައި އެންމެ ފަހު ވަގުތު 25 ރުފިޔާއަށް މަސްކިލޯ އުފުއްލަވާފައި މިއަދުގެ މި ސަރުކާރު އެ ހުރިހާ ބުރައެއް އުފުލަންޖެހޭ ގޮތަށް އެންމެ ލާރިއެއް ވެސް ދޫނުކޮށް އެމީހުން އެ ދިޔައީ," ޝާޑު ވިދާޅުވި އެވެ.
އައްޑޫ މަސްވެރިންނަށް ލިބެން ޖެހޭ ދެ މަހަށް ވުރެ ގިނަ ދުވަހުގެ ފައިސާ ލިބުން ލަސްވާ ކަމަށް ބުނެ މުޒާހަރާ ކުރަން ފެށީ މިދިޔަ ހުކުރު ދުވަހު އެވެ. އެ މީހުބް ބުނަމުން އަންނަނީ ފައިސާ ނުދެނީސް މުޒާހަރާ ހުއްޓާ ނުލާނެ ކަމަށެވެ.