އައްޑޫގައި މިހާރު ކުރިއަށްދާ މަސްވެރިންގެ މުޒާހަރާއާ އެކީ ރައްޔިތުުން ތިބިކަން ހާމަކޮށް ދިނުމުގެ ގޮތުން އައްޑޫގައި އެންމެ ގިނަ މަސްވެރިން ތިބި މަރަދޫން، މަސްވެރިންނަށް ތާއީދުކޮށް އިހުތިޖާހުގައި ބައިވެރިވާން ފަށައިފި އެވެ.
އެގޮތުން މަސްވެރިންގެ އާއިލާތަކުން ރޭ ވަނީ މަރަދޫ ބަނދަރުގައި އިހުތިޖާޖެއް ބާއްވައިފަ އެވެ. އެ އިހުތިޖާޖުގައި "މަސްވެރިންނާ އެކީ ރައްޔިތުން"، "މަސްވެރިންގެ ލާރި ކޮބާ؟" އަދި "މަސްވެރިންނަށް ކުރާ އަނިޔާ ހުއްޓާލައި، ލާރި ދޫކުރޭ" ފަދަ ޝުއޫރުތައް ލިޔެފައިވާ ބޯޑުތައް ބޭނުންކޮށްފައިވެ އެވެ.
މުޒާހަރާ ކުރާ މަސްވެރިންނާ އެކީ މަރަދޫ ރައްޔިތުން ތިބިކަން ހާމަކޮށް މަރަދޫގައި އިޖުތިޖާޖު ކުރަން ނިންމީ މަސްވެރިންނާ މަރަދޫގެ އިސް މަސްވެރިންނާ ވެސް މަޝްވަރާކޮށްފަ އެވެ. އެހެންވެ ހުޅުމީދޫގައި ހުންނަ މިފްކޯގެ ފިޝަރީޒް ކޮމްޕްލެކްސްގައި މަސްވެރިން މުޒާހަރާ ކުރިއަށް ގެންދާހާ ދުވަހަކަށް މަރަދޫގެ މަސްވެރި އާއިލާތަކުގެ މީހުން އިހުތިޖާޖުގައި ދެމިތިބޭނެ ކަމަށް ބުނެފައިވެ އެވެ.
މަރަދޫ މަސްވެރިން ބުނެފައިވާ ގޮތުގައި ފާއިތުވި ދެ މަހާއި 17 ދުވަހަށް އެ އަވަށުގެ މަސްވެރިން ކިރުވި މަހަށް 8.3 މިލިއަން ރުފިޔާ ލިބެން ޖެހެ އެވެ.
މަސްވެރިންގެ އެންމެ ބޮޑު ޑިމާންޑަކީ އެ މީހުންނަށް ވީހާ ވެސް އަވަހަކަށް ފައިސާ ދިނުމެވެ. އަދި ކުރިއަށް އޮތް ތަނުގައި ކިރުވާ މަހަށް ގިނަވެގެން 15 ދުވަހުގެ ތެރޭގައި ފައިސާ ލިބޭނެ އިންތިޒާމެއް ސަރުކާރުން ހަމަޖައްސައި ދިނުމެވެ.
އައްޑޫ މަސްވެރިން މުޒާހަރާ އަށް ނުކުތީ މިދިޔަ ހުކުރު ދުވަހު އެވެ.
މިކަމާ ގުޅިގެން ސަރުކާރުން ބުނެފައި ވަނީ ފައިސާ ނުދެވި ލަސްވަނީ ފައިސާގެ ތާށިކަމާ ހުރެ ކަމަށާއީ ވީހާ ވެސް އަވަހަކަށް ފައިސާ ދެވޭތޯ މިފްކޯ އިން ހުއްޓުމެއް ނެތި މަސައްކަތް ކުރަމުން އަންނަ ކަމަށެވެ.
މަސްވެރިން ބުނަމުން އަންނަނީ ފައިސާ ނުދޭހާ ހިނދަކު މުޒާހަރާ ކުރިއަށް ދާނެ ކަމަށެވެ. މި މުޒާހަރާގެ ތެރެއިން މަސްވެރިން ވަނީ ފިޝަރީޒް ކޮމްޕްލެކްސްގެ އޮޕަރޭޝަން ވެސް ހުއްޓުވައިފަ އެވެ.