ޑައިރެކްޓަރު ސަންޖޭ ބަންސާލީގެ އާ ފިލްމު "ލަވް އެންޑް ވޯ" މި ފަހަރު މާ ހާއްސަ ކަމަށާއި އެ ފިލްމުގެ ސެޓަށް ދާން މިހާރު ވަރަށް ބޮޑަށް ކެތްމަދުވެފައި ހުރި ކަމަށް ބަތަލާ އާލިއާ ބަޓް ބުނެފި އެވެ.
ބަންސާލީ އެންމެ ފަހުން ގެނެސްދިން ފިލްމު 2022 ގެ "ގަންގޫބާއީ ކަތިއަވާޅީ" ގެ ބަތަލާ ބުނީ އާ ފިލްމު ހާއްސަވާ ވަރަށް މުހިއްމު ތިން ސަބައެއް އެބައޮތް ކަމަށެވެ.
އޭގެ ތެރެއިން ފުރަތަމަ ކަމަކީ ފިރިމީހާ ރަންބީރް ކަޕޫރް 2007 ގެ "ސާވަރިއާ" އިން ބޮލީވުޑަށް ނެރުނު ޑައިރެކްޓަރާ އެކީ ރަންބީރު ވަރަށް ޒަމާންކޮށްފައި މަސައްކަތް ކުރާތީ، އެ ދެ މީހުންގެ މަސައްކަތުގެ ވައްޓަފާޅި ބަލާލަން ބޭނުންވުމެވެ. "ލަވް އެންޑް ވޯ" އަކީ ބަންސާލީއާ އެކީ ރަންބީރް މަސައްކަތް ކުރާ ދެވަނަ ފިލްމެވެ.
"އެ ސަބަބަށްޓަކައި އެ މީހުން މަސައްކަތް ކުރާ ގޮތް ބަލާލަން ވަރަށް ބޭނުންވެފައި މި ހުންނަނީ." މި ފިލްމަކީ ފިރިމީހާ ރަންބީރާ އެކީ ކުޅޭ ދެވަނަ ފިލްމުކަން ފާހަގަކޮށް އާލިއާ ބުންޏެވެ.
ދެމަފިރިންގެ ފުރަތަމަ ފިލްމަކީ 2022 ގެ "ބުރައްމަސްތުރާ" އެވެ.
އާލިއާ ބުނީ "ލަވް އެންޑް ވޯ" ހާއްސަވާ އަނެއް ސަބަބަކީ އޭނަ އާއި ރަންބީރާ ވެސް އެކީ ކުރިން މަސައްކަތްކޮށްފައިވާ އެކްޓަރު ވިކީ ކޯޝަލް ވެސް ފިލްމުގެ ކާސްޓްގައި ހިމެނުން ކަމަށެވެ. މިއީ ބަންސާލީގެ ފިލްމެއްގައި، ބަތަލާ ކެޓްރީނާ ކައިފްގެ ފިރިމީހާ މަސައްކަތް ކުރާ ފުރަތަމަ ފަހަރެވެ.
އާލިއާ އާއި ވިކީ އެކީގައި މަސައްކަތްކުރި ފުރަތަމަ ފިލްމަކީ 2018 ގެ "ރާޒީ" އެެވެ. އަދި ވިކީ އާއި ރަންބީރް އެކީގައި މަސައްކަތްކުރި ފުރަތަމަ ފިލްމަކީ ހަމަ އެ އަހަރުގެ "ސަންޖޫ" އެވެ.
"އެހެންވެ އަހަރެމެން ތިން މީހުން އެކީގައި ފިލްމެއްގައި ކުޅެން ލިބުނީމަ ވަރަށް އުފަލުން މި ހުރީ." އާލިއާ ބުންޏެވެ.
އޭނަ ބުނީ "ލަވް އެންޑް ވޯ" ހާއްސަވާ ތިން ވަނަ ސަބަބަކީ އަލުން އަނެއްކާ ވެސް ބަންސާލީއާ އެކީ މަސައްކަތް ކުރުމުގެ ނަސީބު ލިބުން ކަމަށެވެ. ފާހަގަކުރެވޭ ކަމަކީ "ގަންގޫބާއީ" ކުޅެގެން އާލިއާ ނެޝަނަލް އެވޯޑް ވެސް ހޯދާފައިވާކަމެވެ.
"ބަންސާލީއާ އެކީ މަސައްކަތް ކުރަން ލިބުމަކީ ނަސީބެއް ކަމަށް އަހަރެން ދެކެނީ." އާލިއާ ބުންޏެވެ. "އެހެންވެ އޭނަގެ ސެޓަށް ދިއުމުގެ ޝައުގުވެރި ކަމަކީ އެންމެ ބޮޑު ކަންތައް."
މިހާތަނަށް ކާމިޔާބު ފިލްމުތަކެއް ކުޅެފައިވާ ހުނަރުވެރި ބަތަލާގެ ކުރިއަށް އޮތް ފިލްމަކީ އޮކްޓޯބަރު 11 ގައި ގެނެސްދޭން ހަމަޖެހިފައިވާ ޑައިރެކްޓަރު ވަސަން ބާލާގެ "ޖިގްރާ" އެވެ.
އަންނަ އަހަރުގެ ޑިސެމްބަރުގައި ސިނަމާތަކަށް ހަމަޖެހިފައިވާ "ލަވް އެންޑް ވޯ" ގެ ޝޫޓިން ފަށަން ހަމަޖެހިފައި ވަނީ މި އަހަރުގެ ފަހުކޮޅު އެވެ.