މި އަހަރު ހައްޖުގެ އަޅުކަމަށް ދިޔަ މީހުންގެ ތެރެއިން 1،301 މީހަކު މަރުވެފައިވާ ކަމަށް ސައުދީ ސަރުކާރުން ބުނެފި އެވެ.
އެ ގައުމުން ބުނީ މަރުވި މީހުންގެ ތެރޭގައި ގިނައީ ހުއްދަ ނެތި ހައްޖުގެ އަޅުކަން އަދާކުރި މީހުން ކަމަށެވެ. އެގޮތުން މަރުވި މީހުންގެ ތެރެއިން ތިންބައިކުޅަ އެއްބަޔަކީ ހުއްދަ ނެތް ހައްޖަށް ދިޔަ މީހުންނެވެ. ސައުދީގެ ހެލްތު މިނިސްޓްރީން ބުނީ ހައްޖު މޫސުމުގެ ތެރޭގައި މިލިއަނެއްހާ ހައްޖާޖީންނަށް ސިއްހީ އެކިއެކި މައްސަލަތައް ދިމާވެގެގެން ފަރުވާ ދޭން ޖެހުނު އިރު، އޭގެ ތެރޭގައި ހުއްދަ ނެތް 140،000 އަށް ވުރެ ގިނަ މީހުން ހިމެނޭ ކަމަށެވެ.
މި އަހަރުގެ ހައްޖު މޫސުމުގެ ތެރޭގައި ދިމާވި އެންމެ ބޮޑު މައްސަލަ އަކީ އާދަޔާހިލާފަށް ހޫނު ގަވަދުމެވެ. އެގޮތުން ހޫނު ގަދަވެގެން ގިނަ ބަޔަކު މަރުވި އެވެ. މީގެ އިތުރުން މަރުވި ހައްޖާޖީންގެ ތެރޭގައި ތަފާތު ބޮޑެތި ބަލިތަކުގެ މީހުންނާއި އުމުރުން ވަރަށް ދުވަސްވީ މީހުން ހިމެނެ އެވެ.
ސައުދީގެ ހެލްތު މިނިސްޓަރު ފަހުދު އަލް-ޖަލާޖިލް ވިދާޅުވީ ހައްޖު މޫސުމުގެ ތެރޭގައި އާދަޔާހިލާފަށް ހޫނު ގަވަދާނެ ކަމަށް ކުރިން ވެސް ލަފާކުރެވިފައި އޮތުމުން އެކަމަށް ސަމާލުކަން ދިނުމަށާއި ގަދަ ހޫނުން ސަލަމާތްވާނެ ގޮތުގެ އިރުޝާދުތަކެއް ވެސް ހައްޖާޖިންނަށް ދެވުނު ކަމަށެވެ.
މި އަހަރުގެ ހައްޖު މޫސުމުގެ ތެރޭގައި މަރުވި މީހުންގެ ތެރެއިން ގިނަ މީހުންނަކީ މިސްރަށް ނިސްބަތްވާ މީހުންނެވެ. އެގޮތުން އެ ގައުމުގެ 658 ހައްޖާޖީއަކު މަރުވި އެވެ. މީގެ އިތުރުން އިންޑޮނީޝިއާ، ޕާކިސްތާން، އިންޑިއާ، މެލޭޝިއާ، އިރާގު އިރާން، ސޫދާން، ސެނެގާލް، ޖޯޑަން އަދި ކުރުދިސްތާނަށް ނިސްބަތްވާ މީހުން ވެސް މަރުވި މީހުންގެ ތެރޭގައި ހިމެނެ އެވެ.