ޕެރިޝަބަލް ނުވަތަ އަވަހަށް ހަލާކުވާ ޒާތުގެ ކާބޯތަކެތި އައްޑު މިހާރަށް ވުރެ އަވަހަށް އަދި ދާއިމީކޮޮށް ލިބޭނެ އިންތިޒާމު އަންނަ މަހުން ފެށިގެން ހަމަޖެހޭނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފި އެވެ.
އެ ކުންފުނީގެ ސީއީއޯ ސީއީއޯ މުހައްމަދު ވަޖީހު ފޭސްބުކް ޕޯސްޓެއްގައި ވިދާޅުވީ އައްޑު އަށް ޕެރިޝަބަލް މުދާ ކުރިން އުފުލަނީ ލަކުނޑި ބޯޓެއްގައިކަމުން އެ ހިދުމަތް ލިބެނީ ވަކި ދުވަސްވަރެއްގައި ކަމަށެވެ. އަދި އަހަރުތެރޭގެ ވަކި ދުވަސްތަކެއްގައި ޕެރިޝަބަލް މުދާ އައްޑު އަށް ގެންދެވޭ ގޮތަށް ހިދުމަތް ބައްޓަންވެފައި އޮތުމުން އަހަރުގެ ގިނަ ދުވަސްވަރު އައްޑު އަށް އެ މުދާ ފޯރުކޮށް ނުދެވޭ ކަމަށް ވިދާޅުވި އެވެ.
"އެހެންކަމުން އަހަރުތެރޭ ގިނަ ދުވަސްތަކެއްގައި، އެ ސިޓީ އަށް ބޭނުންވާ، މި މުދާ ގެންނަން ޖެހެނީ މާލެ އިން." ވަޖީހު ވިދާޅުވި އެވެ.
ވަޖީހު ވިދާޅުވި ގޮތުގައި ޕެރިޝަބަލް ކާގޯ އައްޑު އަށް ދާއިމީ ގޮތެއްގައި ފޯރުކޮ ށްދިނުމުގެ މަސައްކަތް ހުއްޓުމެއް ނެތި ކުރިއަށް ގެންދެވޭނެ ގޮތެއް އިންތިޒާމެއް ހަމަޖެހުނީ އެމްޕީއެލް އާއި ހިތަދޫ ޕޯޓް ލިމިޓެޑް (އެޗްޕީއެލް) އިން ކުރި މަސައްކަތުން ކަމަށެވެ. އެގޮތުން ލަކުނޑި ބޯޓުފަހަރުގައި ޕެރިޝަބަލް މުދާ ފޯރުކޮށް ދިނުމުގެ ބަދަލުގައި އަންނަ މަހުގެ 1 އިން ފެށިގެން އެ ހިދުމަތް ފޯރުކޮށް ދޭނީ އިންޑިއާގެ ފައިންސް ގުރޫޕުން ހިދުމަތް ދޭނީ ދަގަނޑު ބޯޓުފަހަރު ބޭނުންކޮށްގެން ކަމަށް ވިދާޅުވި އެވެ.
ވަޖީހު ވިދާޅުވީ މި ބަދަލާ އެކީ މުދާ ފޯރުކޮށް ދޭން ފެށުމުން އަހަރުގެ ހުރިހާ ދުވަސްވަރެއްގައި މެދުކެނޑުމެއް ނެތި ޕެރިޝަބަލް ކާގޯ އައްޑު އަށް ލިބެމުން ދާނެ ކަމަށެވެ. އެ ބޯޓުތަކުން އާންމުކޮށް ގެންނާނީ ބިހާއި، އަލުއްވާއި، ފިޔާ އަދި ތަރުކާރީގެ ބާވަތްތަކެވެ.
ޕެރިޝަބަލް މުދަލުގެ އިތުރަށް އައްޑޫ ރައްޔިތުން އިންޑިއާ އިން އ ގެންނަން ބޭނުންވާ އާންމު މުދަލާއި، ކާބޯތަކެތީގެ އެހެނިހެން ބާވަތްތައް ވެސް ދަގަނޑު ބޯޓްގައި ގެނެވޭނެ ކަމަށް ވަޖީހު ވިދާޅުވި އެވެ.
އެމްޕީއެލުން ބުނި އަލަށް ފަށާ ދަތުރުތައް ރާވަނީ ކޮންމެ 10-15 ދުވަހަކުން އައްޑު އަށް ބޯޓެއް ދަތުރު ކުރާ ގޮތަށް ކަމަށެވެ.