މި މަހުގެ ކުރީކޮޅު ރިލީޒްކުރި ހޮލީވުޑްގެ އެނިމޭޓެޑް ފިލްމު "އިންސައިޑް އައުޓް 2" ބޮކްސް އޮފީހުގައި ބޮޑު ކާމިޔާބީއެއް ހޯދަމުން އެބަދެ އެވެ.
ކުރިން އުންމީދު ވެސް ނުކުރާ ވަރުގެ ތަރުހީބެއް މި މަހުގެ 14 ގައި ރިލީޒްކުރި ފިލްމަށް ލިބެމުން އަންނަ އިރު، ދުނިޔޭގެ އެކި އެކި ހިސާބުތަކުން މި ފިލްމަށް މިހާތަނަށް ލިބުނު އާމްދަނީ މިހާރު ވަނީ 724.4 މިލިއަން ޑޮލަރަށް އަރައިފަ އެވެ. ރިލީޒްކުރިތާ 10 ވަރަކަޑށް ދުވަހުގެ ތެރޭގައި މި ވަރުގެ އާމްދަނީއެއް ހޯދާފައިވާތީ މިހާރު ވަރަށް ލަފާކޮށްފައި ވަނީ އަވަހަށް "އިންސައިޑް އައުޓް 2" ބިލިއަން ޑޮލަރުގެ އާމްދަނީއަކާ ހަމައަަށް ވެސް ފޯރާނެ ކަމަށެވެ.
އެންމެ 10 ދުވަހުގެ ތެރޭގައި ޕިކްޒާ އާއި ޑިޒްނީ ގުޅިގެން ގެނެސްދިން މި ފިލްމަށް އިއްޔެއާ ހަމައަށް ލިބުނު އާމްދަނީ 724.4 މިލިއަނަށް އެރި އިރު، 2015 ގައި ރިލީޒްކުރި "އިންސައިޑް އައުޓް" މުޅި ޖުމްލަ އާމްދަނީ އަކީ 858.8 މިލިއަން ޑޮލަރެވެ. ޕީޓް ޑޮކްޓާ ޑައިރެކްޓްކުރި އެ ފިލްމު ހެދީ 175 މިލިއަން ޑޮލަރުގެ ބަޖެޓަކުންނެވެ.
ކެލްސީ މަން ޑައިރެކްޓްކުރި "އިންސައިޑް އައުޓް 2" ހަދާފައި ވަނީ 200 މިލިއަން ޑޮލަރުގެ ބަޖެޓަކުންނެވެ.
މި ފިލްމު ބޮކްސް އޮފީހުގައި ދައްކަމުން އަންނަ ބާރަށް ބަލާ އިރު، މިއީ މި އަހަރުގެ އެންމެ ކާމިޔާބު އެއް ފިލްމަށް ވާނެ ކަމަށް ހޮލީވުޑްގެ ޚަބަރުތައް ދިރާސާކުރާ ފަރާތްތަކުން ބުނެ އެވެ.