ތަމަޅަ ޑައިރެކްޓަރު އެޓްލީ، ބޮލީވުޑްގެ ތަރި ސަލްމާން ޚާނާ އެކީ ހަދަން ޕްލޭންކޮށްފައިވާ ފިލްމުގެ ކާސްޓްގައި ރަޖްނީކާންތު ވެސް ހިމެނޭ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ އެޓްލީގެ އަމާޒަކީ ވަރުގަދަ ދެ ސުޕަސްޓާރުން ހިމަނައިގެން ވަރަށް ވަރުގަދަ އެކްޝަން ފިލްމެއް ހެދުން ކަމަށެވެ. ސަލްމާނާ އެކީ އޭނަ ފިލްމެއް ހަދަން ނިންމައި، ދެ ފަަރާތުގެ މެދުގައި މަޝްވަރާތަކެއް ކުރިއަށްދާކަމުގެ ވާހަކަތަކެއް މީޑިއާތަކުން ރިޕޯޓްކުރީ މިދިޔަ ހަފުތާގަ އެވެ.
ނަމަވެސް އާ ފިލްމާ ބެހޭ ގޮތުން އެޓްލީ މިހާތަނަށް ރަސްމީކޮށް އެއްވެސް އެއްޗެއް ނުބުނެ އެވެ. އޭނަގެ އެންމެ ފަހުގެ ފިލްމަކީ ޝާހްރުކް ޚާނާ އެކީ މިދިޔަ އަހަރު ގެނެސްދިން އެކްޝަން ތުރިލާ "ޖަވާން" އެވެ.
ބޮލީވުޑް ހަންގާމާ އިން ބުނީ ސަލްމާނާއި ރަޖްނީކާންތު ހިމަނައިގެން ހަދާ ފިލްމުގެ ޝޫޓިން މި އަހަރުގެ ފަހުކޮޅު ފަށަން ޕްލޭން ކުރަމުން އަންނަ ކަމަށެވެ.
ސަލްމާން މިހާރު އަންނަނީ ތަމަޅަ ޑައިރެކްޓަރު މުރްގަދޯސްއާ އެކީ "ސިކަންދަރު" ގެ މަސައްކަތް ކުރަމުންނެވެ. މި މަހުގެ 18 ގައި ޝޫޓިން ފެށި މި ފިލްމު ސިނަމާތަކަށް ގެންނާނީ އަންނަ އަހަރުގެ ފިތުރު އީދުގަ އެވެ.