މި އަހަރުގެ މިހާތަނަށް ރާއްޖެ އައި ރަޝިއާ ޓޫރިސްޓުންގެ އަދަދު ވެސް 100،000 އަށް އަރައިފި އެވެ.
ޓޫރިސްޓް އެރައިވަލްސްގެ އެންމެ ފަހުގެ ތަފާސްހިސާބުތައް ދައްކާ ގޮތުން މި މަހުގެ 22 އާ ހަމައަށް ރަޝިއާ އިން އައި ޓޫރިސްޓުންގެ އަދަދަކީ 100،677 އެވެ. އެ ގައުމަކީ ދެވަނަ އަށް މިހާރު އެންމެ ގިނަ ޓޫރިސްޓުން އަންނަ ގައުމެވެ.
އެއް ވަނައިގައި އޮތް ޗައިނާ އިން މިހާތަނަށް އައިސްފައި ވަނީ 113،702 ޓޫރިސްޓުންނެވެ. ތިން ވަނައިގައި އޮތް އިނގިރޭސިވިލާތުން އައިސްފައި ވަނީ 91،032 ޓޫރިސްޓުންނެވެ.
އެންމެ ގިނަ ޓޫރިސްޓުން އަންނަ 10 ގައުމަށް ބަލާ އިރު ލިސްޓްގައި ދެން ހިމެނެނީ އިޓަލީ (78،515 ޓޫރިސްޓުން)، ޖަރުމަން (76،324 ޓޫރިސްޓުން)، އިންޑިއާ 61،052 ޓޫރިސްޓުން)، އެމެރިކާ (35،120 ޓޫރިސްޓުން)، ފްރާންސް (33،362 ޓޫރިސްޓުން)، ސްވިޓްޒަލޭންޑް (22،046 ޓޫރިސްޓުން) އަދި ޕޮލޭންޑް (18،137 ޓޫރިސްޓުން) އެވެ.
މި މަހުގެ 22 އާ ހަމައަށް ރާއްޖެ އަށް ޖުމްލަ 981،070 ޓޫރިސްޓުން އައިސްފައިވެ އެވެ.
ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެފައި ވަނީ މި މަހުގެ ތެރޭގައި އެއް މިލިއަން ވަނަ ޓޫރިސްޓަށް މަރުހަބާ ކިޔާނެ ކަމަށެވެ.
ރާއްޖޭގެ މި އަހަރުގެ ޓާގެޓަކީ 2.3 މިލިއަން ޓޫރިސްޓުންނެވެ.