އުރީދޫ މޯލްޑިވްސް އިން އަންނަ މަހު ބާއްވަން ނިންމާފައިވާ "ފަން ރަން" ގައި ބައިވެރިވާން އިތުރު ފުރުސަތެއް ދީފި އެވެ.
އެ ކުންފުނިން ބުނީ ގިނަ ބައެއްގެ އެދުމުގެ މަތިން ދުވުމުގައި ބައިވެރިވާން ރަޖިސްޓްރީވުމުގެ ފުރުސަތު އަންނަ ބުރާސްފައްޗާ ހަމައަށް ހުޅުވާލާފައިވާ ކަމަށެވެ. ކުރިން ދިން މުއްދަތު ހަމަވީ މި މަހުގެ 10 އަށެވެ.
"ފަން ރަން" މި ފަހަރު ބާއްވަން ހަމަޖެހިފައި ވަނީ އަންނަ މަހުގެ 5 ގައި ލ. އަތޮޅުގަ އެވެ.
"ފަން ރަން" ގެ ލާމު ކިޓްތައް ލިބެން ހުންނާނީ ދެ ކެޓަގަރީއަކަށެވެ. އެއީ ސްޓޭންޑަޑް ކިޓްސް އާއި ފަން ކިޓްސް ކެޓަގަރީ އެވެ. ސްޓޭންޑަޑް ކިޓްގައި ފަން ރަން ޓީޝާޓް އަދި ރިސްޓްބޭންޑް ހިމެނޭ އިރު އަގަކީ 100ރ. އެވެ. އަދި ފަން ކިޓްސް ކެޓަގަރީގެ ފީ އަށް 200ރ. ދައްކަން ޖެހޭ އިރު، ކިޓްގައި އުރީދޫ ފަން ރަން ޓީޝާޓްގެ އިތުރުން ރިސްޓްބޭންޑަކާއި، ފޮތި ދަބަސް، އައިނެއް ބަންޑާނާއެއް ހިމެނޭނެ އެވެ.
މި އިވެންޓް އުރީދޫން ބާއްވަމުން އައުމުގެ އެންމެ ބޮޑު ބޭނުމަކީ ދުޅަހެޔޮ ސިއްހަތެއްގައި ތިބުމަށް ދުވުމަކީ މަޖާ އަދި އުފާވެރިކަން ގެނެސްދޭ ކަސްރަތެއްކަން އަންގައި ދިނުމެވެ.