ކުރިން ވެސް "ކަސޫރު" ކިޔާ ފިލްމެއް ކުޅެފައިވާ ބޮލީވުޑްގެ ތަރި، އަފްތާބް ޝިވްދަސާނީ އަނެއްކާ ވެސް އެ ނަން ކިޔާ ފިލްމެއް ކުޅެން ތައްޔާރުވާން ފަށައިފި އެވެ.
މި ފަހަރުގެ ފިލްމަކީ ލޯބީގެ ބިރުވެރި ފިލްމެކެވެ. އޮގަސްޓް މަހު "ކޭލް ކޭލް މޭ" ގެނެސްދޭން ތައްޔާރުވަމުން އަންނަ ޑައިރެކްޓަރު މުދައްސަރު އަޒީޒުގެ ސްކްރީންޕްލޭއަކަދް ހަދާ "ކަސޫރު" ގެ ޑައިރެކްޓަރަކީ ގްލެން ބަރެޓޯ އެވެ. ކާސްޓްގައި އުރްވަޝީ ރޮޓޭލާ ވެސް ހިމެނޭ ފިލްމުގެ ޕްރޮޑިއުސަރަކީ ދާދި ފަހުން ރިލީޒްކުރި މަނޯޖް ބަޖްޕާއީގެ "ސިރުފް އޭކް ބަންދާ ކާފީ ހޭ" ގެނެސްދިން އާސިފް ޝެއިހް އެވެ.
"ކަސޫރު" އާ ބެހޭ ގޮތުން އާސިފް ބުނީ މިއީ ބެލުންތެރިން ވަރަށް ވެސް ގަޔާވާނެ ކަހަލަ ފިލްމަކަށް ވާނެ ކަމަށާއި އަފްތާބް ފިލްމުގައި ކުޅޭނީ އޭނަ މީގެ ކުރިން ކުޅެފައިވާ ކަހަލަ ވަރަށް ތަފާތު ރޯލެއް ކަމަށެވެ.
މިހާރު ވަރަށް މަދުން ފިލްމުތަކުން ފެންނަ އަފްތާބް ކުރިން ކުޅުނު "ކަސޫރު" އަކީ 2001 ގައި ރިލީޒްކުރި ސައިކޮލޮޖިކަލް ތުރިލާއެކެވެ. އެއީ ބަޓް ކޭމްޕަށް ވިކްރަމް ބަޓް ޑައިރެކްޓްކުރި ފިލްމެކެވެ. "ކަސޫރު" ގެ ބަތަލާ އަކީ ލީސާ ރޭ އެވެ.
އަފްތާބް، 45، އެންމެ ފަހުން ކުޅުނު ފިލްމަކީ 2021 ގެ ކަންނާޑާ ފިލްމު "ކޮޓިގޮއްބާ 3" އެވެ. އަދި އޭނަގެ އެންމެ ފަހުގެ ހިންދީ ފިލްމަކީ 2019 ގެ "ސެޓާސް" އެވެ.