ވެރިކަން ކުރާ ޕާޓީ، ޕީއެންސީގެ ޕީޖީ ލީޑަރު އިނގުރައިދޫ ދާއިރާގެ މެންބަރު އިބްރާހިމް ފަލާހު އެއްޖިންސުން ގުޅުން ހިންގާ މަންޒަރު ފެންނަ ވީޑިއޯއެއް ކަމަށްވާ ސޯޝަލް މީޑިއާގައި އާންމުކޮށްފައިވާ ވީޑިއޯގައި ފެންނަނީ އޭނަ ނޫން ކަމަށް އެ ޕާޓީން ބުނެފި އެވެ.
އެ ވީޑިއޯގައި ފެންނަނީ ފަލާހު އެކްސްގައި އިއްޔެ ޕޯސްޓުކޮށްފައި ވަނީ "ހަސަން ކުރުސީ" ގެ އެކައުންޓުންނެވެ.
އެކަން ކުށްވެރިކޮށް ޕީއެންސީން ރޭ ނެރުނު ބަޔާމެއްގައި ވަނީ ކުރުސީއަށް ފިޔަވަޅު އަޅަން ވެސް ގޮވާލައިފަ އެވެ.
ބަޔާނުގައި ބުނީ، ފަލާހުގެ އަބުރަށް އަރައިގަނެ ހަގީގަތާ ހިލާފު ދޮގު ވާހަކަތަކެއް ސޯޝަލް މީޑީއާގައި ފަތުރަމުން ގެންދާތީ އެކަން އެންމެ ހަރުކަށި އިބާރާތުން ކުށްވެރި ކުރާ ކަމަށެވެ. އަދި ފަތުރަމުން ގެންދާ ވީޑިއޯ ނުވަތަ ފޮޓޯގައިވާ ފަރާތަކީ ފަލާހު ނޫންކަން މީގެ ދެ އަހަރު ކުރިން ދިވެހި ފުލުހުންގެ ހިދުމަތުން ކަށަވަރުކޮށް ދީފައިވާ ކަމަށެވެ.
ފަލާހަ ތުހުމަތުކޮށް ވީޑިއޯގެ ސްނެޕްޝޮޓުތަކެއް ސޯޝަލް މީޑިއާގައި ކުރިން ވެސް ދައުރުކޮށްފައިވެ އެވެ.
ޕީއެންސީން ބުނީ އަލުން އަނެއްކާ ވީޑިއޯތަކާއި ފޮޓޯތައް ފަތުރަން ފެށީ ފިތުނަ އުފައްދައި އަބުރު ކަތިލުމުގު ގޮތުން ކަމަށެވެ.
"މިފަދަ ހަގީގަތާއި ހިލާފު ދޮގު ވާހަކަ ދައްކާ ފަތުރާ ފިތުނަ އުފައްދަން މަސައްކަތް ކުރާ ފަރާތްތަކުގެ މައްސަލަ ބަލާ ފިޔަވަޅު އެޅުމަށް ދިވެހި ފުލުހުންގެ ހިދުމަތަށް ގޮވާލަން." ޕީއެންސީން ބުންޏެވެ.
ވީޑިއޯތަކުގެ މައްސަލާގައި ފަލާހު ވިދާޅުވެފައި ވަނީ "ހަސަން ކުރުސީ" ދެކެ ބިރުނުގަންނަ ކަމަށެވެ.