ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަދުރޭ) ވަގުތު ފާއިތު ނުވަނީސް އިލްމު އުނގެންނެ ޖެހޭ ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.
އިއްޔެ ރޭ ޕީއެންސީގެ ހަރުގެ ހުޅުވަން ބޭއްވި ޖަލްސާގައި ފޮނަދޫ ދާއިރާގެ މަޖިލިސް މެންބަރު ކުރީގެ ރައީސް އަބްދުﷲ ޔާމީނާއި ޔާމީނަށް ނިސްބަތްކޮށް އަދުރޭ ދެއްކެވި ވާހަކަތަކާ ގުޅިގެން ޖަމީލު ރޭ ވަނީ ފޭސްބުކްގައި އަދުރޭ ހަތަރު ނަސޭހަތެއް ދެއްވާ ކަމަށް ވިދާޅުވެފަ އެވެ.
އެގޮތުން ފުރަތަމަ ކަމަކީ ވަގުތު ފާއިތު ނުވަނީސް އުނގެނެން މަސައްކަތް ކުރުމާއި ދަރިން ލިބި މުސްކުޅިވާ އިރު އައުގުރާނަ ގޮވުން ހުއްޓަން ދަސްކުރެއްވުމާއި ތިމާ އަށް ވުރެ ބޮޑެތި މީހުން އަދި ތިމާ އަށް އިޙްސާންތެރިވެފައި ތިއްބެވި ޔާމީނު ފަދަ ބޭފުޅުންނަށް އިޙްތިރާމު ކުރައްވަން ދަސްކުރެއްވުމުގެ އިތުރަށް ބޮޑާނުވުމަށެވެ.
"މިއަދު ކިތަންމެ މަތީގައި ހުއްޓަސް ޙާލަތު ބަދަލު ވާން ނަގާނީ ހިނދު ކޮޅެއް." ޤުރުއާންގެ އާޔަތެއް ވެސް ހިއްސާކުރައްވައި ޖަމީލު ވިދާޅުވި އެވެ.
ޕީއެންސީގެ ޖަގަހަ ޖަލްސާގައި އަދުރޭ ވިދާޅުވީ ޖަމީލަކީ ޕީއެޗްޑީއެއް އޮތަސް އެއަކުން އެއްވެސް ފައިދާވީ ބޭފުޅެއް ނޫން ކަމަށެވެ. އެހެންވެ އެ ޕީއެޗްޑީގެ ބޭނުމެއް ނެތް ކަމަށް ވިދާޅުވި އެވެ. ޖަމީލަށް ފާޑު ވިދާޅުވެ އޭނަ އިތުރަށް ވިދާޅުވީ ޖަމީލަކީ މިހާތަނަށް ކުރައްވަން ނުކުންނެވި އެއްވެސް ކަމެއް ކާމިޔާބުވެވަޑައިގަތް ބޭފުޅެއް ވެސް ނޫން ކަމަށެވެ. އަދި އަބަދު ވެސް މަސައްކަތް ކުރައްވަނީ އެ އިރެއްގައި އޮންނަ ސަރުކާރު ވައްޓާލަން ކަމަށް އަދުރޭ ވިދާޅުވި އެވެ.
އޭނަ ވިދާޅުވީ އަމިއްލަ ދާއިރާ އަށް ވާދަކުރައްވައިގެން 19 ވަރަކަށް ވޯޓް ލިބިވަޑައިގަތް އަދި "ބައިކިލޯ" ހަމަ ނުވާ މީހުންނަށް ކުރެވޭނެ ސިޔާސީ މަސައްކަތެެއް ވެސް ނޯންނާނެ ކަމަށެވެ.