ބޮލީވުޑްގެ މަޝްހޫދު ތަރި، ސަލްމާން ޚާން މިހާތަނަށް ވެސް ކައިވެންޏެއް ނުކޮށް ހުސްކޮށް ހުރީ އޭނަގެ މަންމަ ކަހަލަ އަންހެނަކު ނުލިބިގެން ކަމަށް ބައްޕަ ސަލީމް ޚާން ބުނެފި އެވެ.
ސަލްމާންގެ ހުސްކޮށް ހުންނާތީ ކުރެވުނު ސުވާލަކާ ގުޅިގެން ވާހަކަ ދައްކަމުން ސަލީމް ބުނީ ސަލްމާން ބޭނުން ވަނީ އޭނަގެ އާއިލާގެ ކަންކަމާއި އަދި އެ ނޫން ވެސް ދިރިއުޅުމުގެ ޒިންމާތައް ވަރަށް ފުރިހަމަ އަށް ނަގާނެ ކަހަލަ އަންހެނެއް ކަމަށެވެ. އެގޮތުން މަންމަ ސަަލްމާ ޚާނާކީ އާއިލާ ބެލެހެއްޓުމުގެ ޒިންމާ ވަރަށް ފުރިހަމަ އަށް މިހާތަނަށް ވެސް ނަގާފައިވާ މީހަކަށްވާތީ ހަޔާތުގެ ބައިވަރަކަށް ސަލްމާން އަބަދު ވެސް އުންމީދުކުރީ އެ ކަހަލަ އަންހެނަކަށް ކަމަށް ސަލީމް ބުންޏެވެ.
"އެކަމަކު މި ޒަމާނުގައި އެ ކަހަލަ އަންހެނެއް ހޯދުމަކީ އެއްގޮތަކަށް ވެސް ފަސޭހަ ކަމެއް ނޫން." އެންމެ ދޮށީ ދަރިފުޅު ހުސްކޮށް ހުރުމާ ބެހޭ ގޮތުން ސަަލީމް ބުންޏެވެ.
އޭނަ ބުނީ ސަލްމާނަކީ ވަރަށް އަވަހަށް މީސްމީހުންނަށް ހިތްދޫވާ މީހެއް ކަމަށެވެ. އެކަމަކު ކައިވެންޏަކާ ހަމައަށް ދާން އޭނަ ވަރަށް ބިރުގަނެ، ފަސްޖެހޭ ކަމަށެވެ.
ބޮލީވުޑްގެ އެންމެ ނުފޫޒު ގަދަ އެކްޓަރުންގެ ތެރޭގައި ހިމެނޭ ސަލްމާން، 58، މިހާތަނަށް އެކިއެކި ބަތަލާއިންނާ ރައްޓެހިވެފައިވެ އެވެ. އެއީ ކުރީގެ ބަތަލާ ސަންގީތާ ބިޖިލާނީ އާއި ޕާކިސްތާނަށް ނިސްބަތްވާ ބަތަލާ ސޯމީ އަލީ އާއި އައިޝްވާރިއާ ރާއީ އަދި ކެޓްރީނާ ކައިފެވެ.
މި ބަތަލާއިންނާ އެކީ ސަލްމާން ވަރަށް ސީރިއަސް ލޯބީގެ ގުޅުންތަކެއް ބޭއްވި އިރު، މީގެ ބައެއް ތެރެއިން ބަތަލާއިން އޭނަގެ މައްޗަށް ގެވެށިއަނިޔާކުރިކަމުގެ ބޮޑެތި ތުހުމަތުތައް ވެސް ކޮށްފައިވެ އެވެ. އޭގެ ތެރޭގައި ސޯމީ އާއި އެކްޓަރު އަބީޝެކް ބައްޗަނާ ކައިވެނިކޮށްގެން ދަރިޔަކު ވެސް ހުރި އައިޝްވާރިއާ ހިމެނެ އެވެ.
ސަލްމާން ރައްޓެހިވި ބަތަލާއިންގެ އޭނައާ އަބަދު ވެސް ގާތްކަން އޮންނަ މީހުންނަކީ ސޯމީ އާއި އެކްޓަރު ވިކީ ކޯޝަލާ ކައިވެނިކޮށްގެން އުޅޭ ކެޓްރީނާ އެވެ. ސަލްމާން އެންމެ ފަހުން ފެނިފައި ވަނީ ވެސް ކެޓްރީނާއާ އެކީ ކުޅުނު ފިލްމަކުންނެވެ. އެއީ މިދިޔަ އަހަރުގެ "ޓައިގާ 3" އެެވެ.
ސަލްމާން ހުސްކޮށް ހުރި އިރު، އޭނަގެ ބައްޕަ އަކީ ދެއަންބަށް މީހަކާ އިނދެގެން އުޅޭ މީހެކެވެ. އެއީ ކުރީގެ ބަތަލާ ހެލެންއާ އެވެ. އަދި ސަލްނާން ކޮއްކޮއިންގެ ހަތަރު ކޮއްކޮ އިންގެ ތެރެއިން ފިރިގެން ދެ ކޮއްކޮއިން ކަމަށްވާ އަރްބާޒް ޚާނާއި ސުހައިލް ޚާންގެ ފުރަތަމަ ކައިވެނި، ދަރިން ވެސް ލިބިފައި ވަނިކޮށް ވަނީ ރޫޅިފަ އެވެ.
ނަމަވެސް މި އަހަރުގެ ޖެނުއަރީ މަހު އަރްބާޒް ވަނީ އަލުން ކައިވެނިކޮށްފަ އެވެ.
ސަލްމާންގެ ދެ އަންހެން ކޮއްކޮ އިން ކަމަށްވާ އަލްވިރާ ޚާނާއި އަރްޕިތާ ޚާން ވެސް ކައިވެނިކޮށް ދަރިން އެބަތިއްނެވެ.
އިންޑިއާގެ މީޑިއާތަކުގައި އަބަދު ވެސް ސަލްމާންގެ ކައިވެނީގެ ވާހަކީ އަކީ ވަރަށް ހޫނު ޓޮޕިކެކެވެ. އަދި އެކަމާ ގުޅޭ ގޮތުން އޭނައާ ސުވާކުރުމަކީ ވަރަށް އާންމު ކަމެކެވެ.