މަރަން ހުކުމްކުރި ބޮޑެތި ގިނަ ކުށްވެރިންތަކެއް ދަންޖައްސައި މަރާލުމުގެ ޒިންމާ އުފުލި ބަންގްލަދޭޝްގެ ތަޖުރިބާކާރު ޖައްލާދު، ޝާހްޖަހާން ބުއިޔާން މަރުވެއްޖެ އެވެ.
މީޑިއާތަކުން ބުނީ އުމުރުން 74 އަހަރުގައި އިއްޔެ މަރުވީ މެޔަށް އެރި ކުއްލި ތަދަކާ ގުޅިގެން ޑާކާގެ ސުހަރްވަރީ މެޑިކަލް ކޮލެޖް ހޮސްޕިޓަލްގައި އެޑްމިޓްކޮށް ފަރުވާ ދެމުން ދަނިކޮށް ކަމަށެވެ.
ޝާހްޖަހާންގެ ދުވަސްވީ ޖައްލާދުގެ ކެރިއަރުގައި މަރުވި ހުކުމް އިއްވި ބޮޑެތި ގާތިލުންނާއި ސިޔާސީ އެކިއެކި ލީޑަރުން ވެސް ދަންޖައްސައި މެރުމުގެ ޒިންމާ ނަގާފައިވެ އެވެ. އެގޮތުން އޭނަ މިހާތަނަށް އެފަދަ 26 މީހެއްގެ މަރުގެ ހުކުމް ތަންފީޒުކުރުމުގައި އަމަލީ ގޮތުން ބައިވެރިވެފައިވެ އެވެ.
ޝާހްޖަހާންގެ ޖައްލާދުކަމުގައި ދަންޖައްސައި މެރި މީހުންގެ ތެރޭގައި ބަންގްލަދޭޝްގެ މިހާރުގެ ބޮޑުވަޒީރު ޝެއިހް ހަސީނާގެ ބައްޕަ އަދި ކުދީގެ ރައީސް ޝެއިހް މުޖީބުއް ރަހުމާން އަވަހާރަކޮށްލުމުގައި ބައިވެރިވި އަސްކަރީ އޮފިސަރުންތަކެއް ވެ ހިމެނެ އެވެ.
ޖައްލާދުގެ ތަޖުރިބާގެ ވާހަކަ ޝާހްޖަހާން ލިޔެފައިވާ ފޮތަކުން ވެސް ކިިޔައި ދީފައިވެ އެވެ.
އޭނަ ޖައްލާދެއްގެ މަސައްކަތާ ހަވާލުވީ ވައްކަމާއި ގަތުލުތަކެއްގެ ކުށް 1992 ސާބިތުވެ 42 އަހަރަށް ޖަލަށް ލާފައި ވަނިކޮށް، އެ ހުކުމުން މިދިޔަ އަހަރުގެ ޖޫން 18 ގައި މިނިވަންވުމާ ގުޅިގެންނެވެ. ޝާހްޖަހާން މިނިވަންކުރީ އޭނަގެ އުޅުމަށް އައި ބޮޑެތި އިސްލާހުތަކާ ގުޅިގެންނެވެ.
އޭގެ ފަހުން އޭނަ އުޅުނީ ޖައްލާދެއްގެ ގޮތުގަ އެވެ.
ޖަލުން މިނިވަންވުމުން ޝާހްޖަހާން އޭނަ އަށް ވުރެ 50 އަހަރު ހަގު މީހަކާ ކައިވެނި ވެސް ކުރި އެވެ.