އިންޑިއާގެ ގާނޫނު ހަދާ މަޖިލީހުގެ ތިރިގެ، ލޯކް ސަބާ އަށް އިންތިހާބުވެފައިވާ އެ ގައުމުގެ މަޝްހޫރު ފިލްމީ ތަރި، ކަންގަނާ ރަނާވަތުގެ އާ ފިލްމު "އިމަޖެންސީ" މި އަހަރުގެ ސެޕްޓެމްބަރުގައި ގެނެސްދޭން ނިންމައިފި އެވެ.
ފިލްމުގެ އާ ޕޯސްޓަރަކާ އެކީ މިއަދު ބުނީ ބެލުންތެރިންނަށް ފިލްމު ދޫކޮށްލަން ނިންމާފައީ ވަނީ ސެޕްޓެމްބަރު 6 ގައި ކަމަށެވެ. ކުރިން "އިމަޖެންސީ" ރިލީޒްކުރަން އޮތީ މި މަހުގެ 14 ގަ އެވެ. ނަމަވެސް ފިލްމު ފަސްކުރީ ކަންގަނާ ލޯކް ސަބާގެ ކެމްޕޭންގައި ވަރަށް ބިޒީކޮށް އުޅެން ޖެހުމާ ގުޅިގެންނެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "އިމަޖެންސީ" އަކީ ކަންގަނާ ޕްރޮޑިއުސްކޮށް، ޑައިރެކްޓްކޮށް އަދި ކުޅުނު ސިޔާސީ ފިލްމެކެވެ. މީގައި އޭނަ ފެންނާނީ އިންޑިއާގެ ކުރީގެ ބޮޑުވަޒީރު އިންދިރާ ގާންދީގެ ރޯލުންނެވެ.
"އިމަޖެންސީ" ގެ ކާސްޓްގައި އަނޫޕަމް ކޭރް، މަހީމާ ޗައުދަރީ، ޝްރެޔަސް ތަލްޕަޅޭ، މިލިންދު ސޯމަން، ވިޝާލް ނައިރް އަދި މަރުވެފައިވާ އެކްޓަރު ސަތިޝް ކޯޝިކް ހިމެނެ އެވެ.
ހަތަރު ނެޝަނަލް އެވޯޑް ހޯދާފައިވާ ކަންގަނާގެ އެންމެ ފަހުގެ ފިލްމު ބެލުންތެރިންނަށް ގެނެސްދޭ ތާރީހު އިއުލާންކުރި އިރު، ލޯކް ސަބާގެ ކެމްޕޭންގެ ތެރޭގައި ބުނެފައި ވަނީ ހޮވިއްޖެ ނަމަ ފިލްމީ މަސައްކަތްތައް ހުއްޓާލައި، ސިޔާސީ މަސައްކަތްތަކަށް އެއްކޮށް ހުސްވާނެ ކަމަށެވެ.
ކަންގަނާ އިންތިހާބުވީ ވެރިކަން ކުރާ ބީޖޭޕީގެ ޓިކެޓްގައި، އޭނަގެ އުފަން ސްޓޭޓް ހިމާޗަލް ޕްރަދޭޝްގެން މަންޑީ ދާއިރާއަށެވެ.