މިޔަރަކު ދިން ހަމަލާއެއްގައި އެމެރިކާގެ މަޝްހޫރު ސާފިން ލެޖެންޑް އަދި ހޮލީވުޑްގެ އެކްޓަރު ޓަމާޔޯ ޕެރީ މަރުވެއްޖެ އެވެ.
އާދީއްތަ ދުވަހު އެމެރިކާގެ ހަވާއީގައި މަރުވި ޕެރީ، 49، އަކީ ކަނޑުފޭރޭ ބައެއްގެ ވާހަކަ ކިޔައިދިން މަޝްހޫރު ފިލްމު ސީރީޒް "ޕައިރޭޓްސް އޮފް ކެރީބިއަން" ގައި ވެސް މަސައްކަތްކޮށްފައިވާ މީހެކެވެ. ހުނަރުވެރި ރާޅާއެޅުންތެރިޔާ މަރުވީ ހަވާއީގެ މަލެކަހާނާ ބީޗްގައި އާދީއްތަ ދުވަހު މެންދުރު ރާޅާ އަޅަން އުޅުމުގެ ތެރޭގައި މިޔަރަކު ދިން ހަމަލާއެއްގައި ލިބުނު އަނިޔާތަކާ ގުޅިގެންނެވެ.
މިޑިއާތަކުން ރިޕޯޓްކޮށްފައިވާ ގޮތުގައި ޕެރީ އަށް މިޔަރެއް ހަމަލާ ދިންކަން އެނގުމާ އެކީ ލައިފްގާޑުން ޖެޓްސްކީއެއްގައި ގޮސް އޭނަ ނަގައި، އެއްގަމާ ހަމައަށް ގެނައި އިރު ވެސް އޮތީ މަރުވެފަ އެވެ. އޭރު އޭނަގެ އަތާއި ފައި ވެސް ނެތް ކަމަށް މީޑިއާތަކުން ބުންޏެވެ.
ޕެރީ އަކީ "ޕައިރޭޓްސް އޮފް ދަ ކެރީބިއަން" ގެ ހަތަރު ވަނަ ފިލްމު 2011 ގެ "އޮން ސްޓްރޭންޖާސް ޓައިޑް" ގައި ރޯލެއް ކުޅުނު އެކްޓަރެކެވެ.
އުމުރުން 12 އަހަރުގައި ރާޅާއަޅަން ފެށި ޕެރީ އަކީ ސާފިން ލެޖެންޑެވެ. ޕްރޮފެޝަނަލްކޮށް، ރާޅާއެޅަން ފެށުމުގެ ކުރިން އޭނަ ލައިފްގާޑެއްގެ ގޮތުގައި ވެސް މަސައްކަތްކުރި އެވެ.