ގޭންގުތަކާ ގުޅުން އޮންނަ 400 އެއްހައި ކުޑަކުދިން ތިބިކަން ހޯމް މިނިސްޓަރު އަލީ އިހުސާން ހާމަކުރައްވައިފިއެވެ.
ރައްޔިތުންގެ މަޖިލީހުގެ ސަލާމަތީ ހިދުމަތްތަކުގެ ކޮމިޓީއަށް މައުލޫމާތު ދެއްވަމުން މިނިސްޓަރު އިހުސާން ވިދާޅުވީ، އެންމެ ފަހުން ހެދި އެސަސްމެންޓުން ދައްކާ ގޮތުން ރާއްޖޭގައި، އަޅައިލަން ޖެހިފައި ތިބި 400 އެއްހާ ކުދިން ތިބިކަމަށެވެ.
ރާއްޖޭގެ ގޭންގުގެ މައްސަލައަށް ދާއިމީ ހައްލެއް ގެނައުމަށް ގާނޫނުތައް އިސްލާހު ކުރަންޖެހޭ ކަމަށާއި އަދި ފުލުހުން އިތުރަށް ބާރުވެރިކުރަން ޖެހޭކަން މިނިސްޓަރު އިހުސާން ފާހަގަ ކުރެއްވިއެވެ.
ގޭންގުތައް ހުޓުވުމަށް ގޭންގުތަކަށް ފައިސާ ލިބޭނެ މަގުތައް ބަންދުކުރަން ޖެހޭކަމަށާއި އަދި ގޭންގުތަކަށް ރެކްރޫޓުކުރާ ކުދިން ހުއްޓުވަންޖެހޭ ކަމަށްވެސް މިނިސްޓަރު އިހުސާން ވިދާޅުވިއެވެ.
މިނިސްޓަރު އިހުސާން ވިދާޅުވީ ސަރުކާރުގެ ޕްލޭނަކީ ގޭންގްތަކާ ގުޅުން އޮންނަ ކުދިން 18 އަހަރު ވަންދެން ހޯޕް އައިލެންޑުގައި ބޭތިއްބުން ކަމަށެވެ. އަދި އެކުދިން 18 އަހަރުވުމަށްފަހު އެސެސްމަންޓު ހެދުމަށްފަހު މުޖުތަމައަށް ދޫކޮށްލުންކަންވެސް ފާހަގަ ކުރެއްވިއެވެ. އަދި އެނޫން ކުދިން ސިފައިންނާއި ފުލުހުންގެ ތެރެއަށް ރެކްރޫޓު ކުރާނެކަން ފާހަގަ ކުރެެއްވިއެވެ.
މީގެއިތުރުން މިނިސްޓަރު އިހުސާން ވިދާޅުވީ ހޯޕް އައިލެންޑުގައި ކުދިން ތިބޭއިރު އާއިލާއާ ގުޅުން ބަދަހިކުރެވޭނެ ގޮތްތަކަކަށް ކަންކަން ބައްޓަން ކުރެވޭނެ ކަމަށެވެ.