ހުޅުދޫން ގޯތި ހަވާލު ކުރަން އިން ވަކިކުރަން ފަށައިފި

އައްޑޫ ހުޅުދޫން ގޯތި ލިބުނު މީހުންނަށް ގޯތިތައް ހަވާލުކުރުމަށްޓަކައި ގޯތި ދޫކުރާ ސަރަހައްދުގައި އިން ވަކިކުރަން ފަށައިފި އެވެ.

މި މަސައްކަޔް ފެށީ މިއަދެވެ. ހުޅުދޫ އަވަށު އޮފީހުން ބުނީ އަމާޒަކީ ވީހާ ވެސް އަވަހަކަށް މި މަސައްކަތް ނިންމައި ގޯތިތައް ހަވާލުކޮށް ނިންމުން ކަމަށެވެ. ހުޅުދޫން ދޫކުރަން ނިންމީ 2،000 އަކަފޫޓްގެ 100 ގޯއްޗެކެވެ.

އެ އަވަށުގެ އިތުރުން މީދު އާއި ފޭދޫގެ އިތުރުން ހިތަދޫ ވެސް ހިމަނައިގެން ޖުމްލަ 1،000 ގޯތި ދޭން ނިންމައި، އައްޑޫ ސިޓީ ކައުންސިލުން އެ ފުރުސަތު ހުޅުވީ މިދިޔަ އަހަރުގެ ޖެނުއަރީ މަހުގެ ތެރޭގަ އެވެ.

މީދޫ އިން ވެސް ދޫކުރަން ނިންމީ 2،000 އަކަފޫޓްގެ 100 ގޯއްޗެވެ. ހިތަދޫން ދޫކުރަން ނިންމީ 1،500 އަކަފޫޓްގެ 500 ގޯއްޗެވެ، އަދި ފޭދޫން 1،500 އަކަފޫޓްގެ 300 ގޯއްޗެވެ.

ހިތަދޫން ގޯތި ލިބުނު ބައެއް މީހުންނާ ގޯތި ހަވާލުކޮށް ނިންމާފައިވާ އިރު، އެހެން އަވަށްތަކުގައި މަސައްކަތް ކުރިއަށް އޮތީ އެވެ.

އައްޑޫގެ ހަތަރު އަވަށަކުން ގޯއްޗަށް ހުޅުވައިލުމުން 4،000 އަށް ވުރެ ގިނަ މީހުން ކުރިމަތިލި އެވެ. އެހެންވެ ކައުންސިލުން ނިންމާފައި އޮތޫ ޝަރުތު ހަމަވާ އެންމެންނަށް ވެސް ގޯތި ދޭށެވެ.