ޖަޕާންގެ ހޮޓަލަކުން އިޒްރޭލުގެ ޓޫރިސްޓުން ހަދާފައިވާ ބުކިންސްތައް ކެންސަލް ކުރާތީ ޓޯކިއޯގައި ހުންނަ އިޒްރޭލުން އެމްބަސީން އެކަން ކުށްވެރިކޮށް އެވެ.
އެތަނުގެ ސަމާލު ކަމަށް މިކަން އައުމާ ގުޅިގެން ނެރުނު ބަޔާނެއްގައި ބުނީ މި ކަމަކީ ސީދާ ތަފާތުކުރުމުގެ އަމަލެއް ކަމަށާއި އެކަން ހަރުކަށި އިބާރާތުން ކުށްވެރިކުރާ ކަމަށެވެ.
މީޑިއާތަކުން ބުނީ އިޒްރޭލުގެ ޓޫރިސްޓުންގެ ބުކިންސް ކެންސަލް ކުރަމުން އަންނަނީ ކިއޯޓޯގައި ހިންގަމުން އަންނަ "ހޮޓެލް މެޓީރިއަލް" ކިޔާ ސިޓީ މަޝްހޫރު ހޮޓަލަކުން ކަމަށެވެ. އެގޮތުން އިޒްރޭލުގެ ޓޫރިސްޓުންތަކެއް ހަދާފައިވާ ބުކިންސް ކެންސަލްކޮށް ފޮނުވި ވަޓްސްއެޕް މެސެޖްތަކެއްގައި ހޮޓަލުގެ މެނޭޖަރު ވިދާޅުވެފައި ވަނީ ފަލަސްތީނާ ދެކޮޅަށް އިޒްރޭލުން ހިންގަމުންދާ ހަނގުރާމައިގެ ޖަރީމާތަކަށް ވާގިދޭ މީހުންގެ ބުކިންސް މިހާރު ބަލައިގަނެވެން ނެތް ކަމަށެވެ.
މިކަމާ ގުޅިގެން އިޒްރޭލުގެ އެމްބަސީން އެކަން ކުށްވެރިކޮށްފައިވާ އިރު، ޖަޕާނުގެ ހޮޓެލް ބިޒްނެސް ގާނޫނާ "ހޮޓެލް މެޓީރިއަލް" އިން ހިލާފުވަމުންދާ ކަމަށް ކިއޮޓޯގެ ސަރަހައްދީ ސަރުކާރުން ވެސް ކަންބޮޑުވުން ފާޅުކޮށްފައިވެ އެވެ.
ސަރުކާރުގެ އޮފިޝަލަކު ވިދާޅުވީ ވަކި ގައުމެއްގެ ބަޔަކަށް ހިދުމަތް ނުދޭން ހޮޓަލަކުން ނިންމުން ގޯސް ކަމަށާއި މިކަމާ ގުޅިގެން މިކަން ހިނގައިދާ ގޮތް ބަލަން "ހޮޓެލް މެޓީރިއަލް" އަށް ސަރުކާރުގެ ޓީމަކުން ޒިޔާރަތް ވެސް ކޮށްފައިވާ ކަމަށެވެ. އަދި މިކަމާ ގުޅޭ ގޮތުން ބަލަން ޖެހޭ ކަންކަން ބަލައި ފިޔަވަޅު އަޅަން ޖެހޭ ނަމަ ފިޔަވަޅު އަޅާނެ ކަމަށް އޮފިޝަލް ވިދާޅުވި އެވެ.
މިކަމާ ގުޅޭ ގޮތުން "ހޮޓެލް މެޓީރިއަލް" އިން ރަސްމީކޮށް ވަކި އެއްޗެއް ބުނެފައެއް ނުވެ އެވެ.
އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކާ ގުޅިގެން، އަނިޔާވެރި ޔަހީދިންނަށް ދަތިކުރަން ބައެއް ގައުމުތަކުން އެތަނުގެ ޕާސްޕޯޓް ވެސް މަނާކޮށްފައިވެ އެވެ. މީގެ އިތުރުން އިޒްރޭލަށް ވާގިދޭ ކުންފުނިތަކުގެ އުފެއްފުންތައް ވެސް އެކި ގައުމުތަކުން ބޮއިކޮޓްކޮށްފައިވެ އެވެ.
އަބަދު ބެސް ފަލަސްތީނުގެ މުސްލިމުންނަށް އަނިޔާވެރިވަމުންދާ އިޒްރޭލުން މިދިޔަ އަހަރުގެ އޮކްޓޯބަރު 7 އިން ފެށިގެން ދަނީ ފަލަސްތީނުގެ ނަސްލު ނައްތައިލަން ގަތުލުއާންމު ހިންގަމުންނެވެ. މިކަމުގައި މިހާތަނަށް 40،000 އާ ގާތް ކުރާ އަދަދަކަށް ފަލަސްތީނުގެ މީހުން ވަނީ ޝަހީދުކޮށްފަ އެވެ.