އެމްްއެންޑީއެފް ސެންޓްރަލް އޭރިއާ ކޮމާންޑްގައި "އެކްސަސައިޒް ބެލެންސް ފްލޭޝް މެޓަލް" ގެ ނަމުގައި ތަމްރީނު ޕްރޮގްރާމެއް އިއްޔެ ފަށައިފި އެވެ.
އެމެރިކާގެ އަސްކަރިއްޔާއާ ގުޅިގެން އެމްއެންޑީއެފުން ކުރިއަށް ގެންދާ މި އެކްސަސައިޒް ކުރިއަށް ދާނީ އަންނަ މަހުގެ 19 އާ ހަމައަށް، ލ .އަތޮޅުގެ އެއްގަމާއި ކަނޑުގެ ސަރަހައްދުތަކުގަ އެވެ.
އެގޮތުން ތަމްރީނުތަކުގައި، އެމްއެންޑީއެފް ކޯސްޓްގާޑުގެ ސިފައިންނާއި، އެމްއެންޑީއެފް ސްޕެޝަލް ފޯސަސްގެ މެންބަރުންނާއި، މެރިންސް ބައިވެރިވެ އެވެ. އަދި އެކްސަސައިޒްގެ މުދައްރިބުންގެ ގޮތުގައި، އެމެރިކާ އަސްކަރިއްޔާގެ ސިފައިން އަންނަނީ ހަރަކާތްތެރިވަމުންނެވެ.
މި އެކްސަސައިޒަކީ، އެމްއެންޑީއެފްގެ ޤާބިލްކަން އިތުރުކުރުމުގެ ގޮތުން، އެމެރިކާ އަސްކަރިއްޔާއާ ގުޅިގެން ސިލްސިލާކޮށް ބާއްވަމުން އަންނަ ތަމްރީނުތަކުގެ ތެރެއިން ކުރިއަށް ގެންދާ ތަމްރީނެކެވެ.