އިންޑިއާގެ މަޝްހޫރު ފިލްމީ ތަރި، ކަމަލް ހަސަންގެ "އިންޑިއަން 2" ގެ ޓްރެއިލާ އާންމުކޮށްފި އެވެ.
އަންނަ މަހުގެ 12 ގައި ސިނަމާތަކަށް ގެންނަން ތާވަލުކޮށްފައި އޮތް މި ފިލްމަކީ މި އަހަރު ވަރަށް ގިނަ ބަޔަކު އިންތިޒާރު ކުރަމުން އަންނަ އެއް ފިލްމެވެ. "އިންޑިއަން 2" ގެ ޓްރެއިލާ ބެލި ގިނަ ބަޔަކު ފިލްމު ވަރަށް ޝައުގުވެރިވާނެކަމުގެ ކުލަވަރު ބޮޑު ކަމަށާއި މިއީ ބޮކްސް އޮފީހުގައި ބޮޑު ކާމިޔާބީއެއް ވެސް ހޯދާނެ ފިލްމެއް ކަމަށް ބުނެފައިވެ އެވެ.
މި ފިލްމަކީ ކުޅަދާނަ ތަމަޅަ ޑައިރެކްޓަރު އެސް ޝަންކަރް، ކަމަލް ހަސަނާ އެކީ 1996 ގައި ގެނެސްދިން ކާމިޔާބު އެކްޝަން ފިލްމު "އިންޑިއަން" ގެ ސީކްއެލް އެވެ. ބެލުންތެރިންގެ ވަރަށް ބޮޑު މަގުބޫލު ކަމެއް ހޯދި ފިލްމުގެ ބަތަލާއިންނަކީ އުރްމިލާ މަޓޯންޑްކަރާއި މަނީޝާ ކޮއިރަލާ އެވެ.
"އިންޑިއަން 2" ގައި ރަކުލް ޕްރީތު ސިންގް، ސިދާތު، ޒާކިރު ހުސައިން، ޕިޔޫޝް މިޝްރާ އަދި ގުލްޝަން ގްރޯވާ ފަދަ ތަރިން ހިމެނެ އެވެ.
މި ފިލްމުގެ ކުރިން އަންނަ ބުރާސްފަތި ދުވަހު ކަމަލް ހަސަން މުހިއްމު ރޯލެއް ކުޅެފައިވާ ޑައިރެކްޓަރު ނާގް އަޝްވިންގެ "ކަލްކީ: 2898 އޭޑީ" ސިނަމާތަކަށް އަންނާނެ އެވެ. މީގެ ކާސްޓްގައި ޕްރަބާސް، ދީޕިކާ ޕަދްކޯން، އަމީތާބް ބައްޗަން އަދި ޑިޝާ ޕަޓާނީ ހިމެނެ އެވެ.