އައްޑޫ ހަންކެޑެއިގެ ބްރިޖްގެ މަސައްކަތް މިހާރު އޮތީ ނިމުމުގެ އެންމެ ފަހު މަރުހަލާގެ ތެރޭގައި ކަމަށާއި އަންނަ މަހު ބްރިޖް ހުޅުވަން ތައްޔާރީތައް ވަމުން އަންނަ ކަމަށް ކޮންސްޓްރަކްޝަން މިނިސްޓްރީން ބުނެފި އެވެ.
އިންޑިއާގެ އެފްކޮންސް އިންސްފްރާސްޓްރަކްޗާ އިން ހަދަމުން އަންނަ މި ބްރިޖްގެ އެންމެ ފަހުގެ މައުލޫމާތު ހިއްސާކޮށް މިނިސްޓްރީން ބުނީ މި ޝްރޫޢުގައި ހިމެނޭ ޑީޓުއަ ބްރިޖު މަސައްކަތުގެ 95 ޕަސެންޓް މިހާރު ނިމިފައިވާ ކަމަށެވެ. އަދި ބްރިޖުގެ ކުރިއަށް ހުރި މަސައްކަތްތަކުގެ ތެރޭގައި ހިމެނެނީ ކްރޭޝް ބެރިއާ އަދި އެކްސްޕޭންޝަން ޖޮއިންޓް ހަރުކުރުމުގެ އިތުރަށް މި މަސައްކަތްކުރުމަށް ވަގުތީ ގޮތުން އަޅާފައިވާ ވެލިތައް ބްރިޖުގެ ދަށުން ނެގުން ކަމަށެވެ.
"[އެހެންވީމަ] ޖުލައި މަހު އާންމުންނަށް ބޭނުން ކުރެވޭ ގޮތަށް ބްރިޖު ހުޅުވާލުމުގެ ތައްޔާރީތަށް ދަނީ ވަމުން." މިނިސްޓްރީން ބުންޏެވެ.
އައްޑޫ ލިންކް ރޯޑް ހެދި އިރު، މަރަދުއާ އިންވެގެން އޮންނަ ހަންކެޑެ އާއި ގައުކެނޑިއާ ދެމެދު އެޅި ބްރިޖްގެ ބަދަލުގައި އާ ބްރިޖެއް އަޅަން ނިންމީ ޓޫރިޒަމަށް ހަންކެދެ ތަރައްގީ ކުރަން ނިންމުމާ ގުޅިގެން ހަންކެޑައިގެ ބިމުގެ ބޭނުން އެންމެ ފުރިހަމަ ގޮތުގައި ހިފުމުގެ ގޮތުންނެވެ.
އެގޮތުން އާ ބްރިޖްގެ މަސައްކަތް ފެށީ 2021 ގަ އެވެ. އެފްކޮންސް އިން މި މަސައްކަތް ކުރިއަށް ދަނީ އެ ކުންފުނިން އައްޑޫގައި ކުރިއަށް ގެންދާ މަހު ހެދުމުގެ ބިޔަ މަޝްރޫއުގެ ތެރެއިންނެވެ.
ހަންކެޑެ އިންޓަގްރޭޓެޑް ޓޫރިޒަމަށް ތަރައްގީ ކުރަން ކުރިއަށް ގެންދާ މަޝްރޫއު ރަސްމީކޮށް އިފުތިތާހުކޮށްފައި ވަނީ މި އަހަރުގެ އެޕްރީލް 15 ގަ އެވެ.
ހަންކެޑެ ތަރައްގީ ކުރަން ފަންޑު މެނޭޖްމަންޓު ކޯޕަރޭޝަން (އެމްއެފްއެމްސީ) އިން ހަވާލުކޮށްފައި ވަނީ ޗައިނާގެ ކުންފުންޏެއް ކަމަށްވާ ޗައިނާ ނޭޝަނަލް އިލެކްޓްރިކަލް އިންޖިނިއަރިން (ސީއެންއީސީސީ) އާ އެވެ. އެކަމުގެ އެއްބަސްވުމުގައި ސޮއިކުރީ މިދިޔަ އަހަރުގެ މާޗް 30 ގަ އެވެ.
ހަންކެޑެ ތަރައްގީ ކުރަން ހަމަޖެއްސީ ބޭންކް އޮފް ޗައިނާ އިން 145 މިލިއަން ޑޮލަރު (2.2 ބިލިއަން ރުފިޔާ) ގެ ލޯނެއް ނަގައިގެންނެވެ. މި ޕްރޮޖެކްޓްގައި ޖުމްލަ 1،041 ކޮޓަރި ހިމެނެ އެވެ. އަދި އެއީ ބެޑް ކެޕޭސިޓީ އަށް ބަލާ އިރު، 2،080 އެނދެވެ.