ރާއްޖޭގެ ފުޓްބޯޅަ ތަރި، މުހައްމަދު އާރިފު (ބަކާ) ނިޔާވުމާ ގުޅިގެން އޭނަގެ އަންހެނުން ފާތިމަތު ފިލްޒާ އާއި އާއިލާ އަށް ރައްޔިތުންގެ މަޖިލީހުން ތައުޒިޔާ ކިޔައިފި އެވެ.
އުސްތާޒާ ފިލްޒާ އަކީ ރައްޔިތުންގެ މަޖިލީހުގެ ކައުންސެލް ޖެނެރަލް އެވެ.
ބަކާ، 38، ނިޔާވީ ހައްޖުގެ އަޅުމަކަށް ފަހު، ހޯމަ ދުވަހު މާލެ އައިނަތަނާ އެ ރޭ ހާލު ދެރަވެ، އޭޑީކޭ ހޮސްޕިޓަލުގެ އައިސީޔޫގައި ފަރުވާ ދެމުން ދަނިކޮށް އިއްޔެ ހަވީރު އެވެ. އޭނަ ހައްޖަށް ދިޔައީ ސައުދީ ރަސްގެފާނުގެ ދެއްވި ދައުވަތުފުޅުގެ ތެރެއިން ލިބުނު ފުރުސަތެއްގަ އެވެ.
އައްޑޫ ހިތަދު އަށް ނިސްބަތްވާ ބަކާ އަކީ ރާއްޖޭގައި މި ފަހުން އުފެދުނު އެންމެ ކާމިޔާބު އަދި ހުނަރުވެރި ފުޓްބޯޅަ ކުޅުންތެރިންގެ ތެރެއިން އެކެކެވެ. އޭނަ ރާއްޖޭގެ މަޝްހޫރު ގިނަ ކުބަލްތަކަކަށް ކުޅެފައިވާ އިރު، މިއަންމާގެ ޓީމެއް ކަމަށްވާ ކަންބަވްޒާ އެފްސީ އަށް ވެސް 2014 ގައި ބަކާ ކުޅުނެވެ.
ބަކާގެ ވަކިވުމާ ގުޅިގެން ރާއްޖޭގެ ފުޓްބޯޅަ އާއިލާ އާއި އާންމުންގެ އެތައް ބަޔަކު ސޯޝަލް މީޑިއާގައި ހިތާމަ ފާޅުކޮށްފައިވުމެވެ. ބަކާގެ ވަކިވެ ދިއުމާ ގުޅޭ ގޮތުން ރާއްޖޭގެ ފުޓްބޯޅައިގެ މައި އިދާރާ، އެފްއޭއެމުން ރޭ ބުނީ ބަކާ އަކީ ފަހުގެ ތާރީޚެއްގައި ދިވެހި ފުޓުބޯޅައިން ފެނުނު އެންމެ ހުނަރުވެރި، ވިދުން ގަދަ، ފުޓުބޯޅައިގައި ރާއްޖެ އަށް ހޯދުނު އެންމެ ބޮޑު ކާމިޔާބުގެ މުހިއްމު ހިއްސާދާރު ކަމަށެވެ. އަދި އޭނަ ނިޔާވުމަކީ ދިވެހި ފުޓުބޯޅަ އާއިލާ އަށް، އަދި ދިވެހި ކުޅިވަރަށް ލިބިގެންދިޔަ ފޫނުބެއްދޭ ވަރުގެ ގެއްލުމެއް ކަމަށެވެ.
ބަކާ އަކީ ސާފް ޗެމްޕިއަންޝިޕްގެ ތަށި ރާއްޖެ އިން 2008 ގައި ނެގި އިރު، ގައުމީ ޓީމުގައި ހިމެނުނު ކުޅުންތެރިއެކެވެ.