އެމްޑީޕީ އަލުން ކޮޅަށް ތެދުވެ ޕާޓީގެ ހަރަކާތްތަކުގެ އަމަލީ މަސައްކަތްތައް އަންނަ މަހު މެމްބަރުން ފެންނަން ފަށާނެ ކަމަށް މަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ވިދާޅުވެއްޖެ އެވެ.
އެމްޑީޕީން މިއަދު 19 ވަނަ އަހަރީ ދުވަސް ފާހަގަ ކުރަމުން އަންނަ "ރާއްޖެ ޓީވީ" ގައި އިބޫ ވިދާޅުވީ އިންތިހާބުތަކުން ބަލިވުން ފަދަ އުނދަގޫ ދަނޑިވަޅުތައް ދިމާވި ނަމަވެސް އެއިން ކޮންމެ ފަހަރަކު ވެސް ޕާޓީ ކޮޅަށް ޖަހައި ހަރަކާތްތައް ހިންގަން ފަށާ ކަމަށެވެ.
އެގޮތުން ޕާޓީގެ މިހާރުގެ ލީޑަޝިޕުން އަންނަނީ ޕާޓީ ރިޕޯމް ކުރުމުގެ މަސައްކަތް ކުރަމުން ކަމަށްވާތީ އަންނަ މަހުގެ ތެރޭގައި އެމްޑީޕީ އާ ރޫހަކާއި ޖޯޝަކާ އެކީ ސިޔާސީ މަސައްކަތްތަކަށް ނުކުންނާ ކަމަށެވެ.
"ވަރަށް ގިނަ މަސައްކަތްތަކެއް ކުރައްވަމުން އެބަ ގެންދަވާ. އަޅުގަނޑަށް ގަބޫލުކުރެވޭ ގޮތުގައި މި ފެށޭ ޖުލައި މަހުގެ ތެރޭގައި އަމަލީ މަސައްކަތްތައް ތިބޭފުޅުންނަށް އަޅުގަނޑުގެ ޕާޓީގެ ބޭފުޅުންނަށްް ފެނިގެން ދާނެ،" އެމްޑީޕީގެ ޕާޓީގެ އެޑްވައިޒަރުގެ މަގާމުގައި ހުންނެވި އިބޫ ވިދާޅުވި އެވެ. "ހަމަ ވަރަށް ރަނގަޅު މަސައްކަތްތަކެއް ފެނިގެން ދާނެ."
އަހަރީ ދުވަހާ ގުޅިގެން މާލޭގައި ހުންނަ އެމްޑީޕީ އޮފީހުގައި މިއަދު ހަވީރު ދިދަ ނެގުމުގެ ރަސްމިއްޔާތެއް ބާއްވަން ވަނީ ނިންމައިފަ އެވެ. އެއީ 4:30 ގަ އެވެ.