އައްޑޫގެ ސަޕްލައި ފެނުގެ ނިޒާމު އަޕްގްރޭޑް ކުރުމުގެ އަމަލީ މަސައްކަތް އެމްޑަބްލިއުއެސްސީން ފަށައިފި އެވެ.
އެ ކުންފުނިން މި މަސައްކަތް އިއްޔެ ފެށީ ހިތަދޫ ސައިޓްގަ އެވެ. އެގޮތުން މިހާރު އެތަނުގައި ޑްރިލިން މަސައްކަތް ކުރިއަށްދާ ކަމަށް ފެން ކުންފުނިން ބުންޏެވެ.
އައްޑޫގެ ގުޅިފައިވާ އަވަށްތަކުން ފެނުގެ ހިދުމަތް ކެނޑޭ މައްސަލަ އާއި ޖުމްލަކޮށް މުޅި އައްޑޫގެ ފެނުގެ ނިޒާމު އަޕްގްރޭޑް ހިންގާ މަޝްރޫއު އެމްޑަބްލިއުއެސްސީ ކޮންސްޓްރަކްޝަން މިނިސްޓްރީން ހަވާލުކުރީ އެޕްރީލް މަހުގެ 13 ގަ އެވެ. އަހަރު ދުވަހުގެ ތެރޭގައި ނިންމަން ހަމަޖެހިފައިވާ މަޝްރޫއުގެ އަގަކީ 282.6 މިލިއަން ރުފިޔާ އެވެ.
މި މަޝްރޫއުގެ ދަށުން ހިތަދޫގައި އާރްއޯ ފެސިލިޓީ ބިލްޑިން ގާއިމުކުރުމާއި ބޯހޯ ތޮރުފުމާއި، ދުވާލަކު 1500 ޓަނުގެ ބޯފެން އުފެއްދޭ ދެ އާރްއޯ ޕްލާންޓް ބެހެއްޓުމާއި ފެން ރައްކާކުރުމަށްޓަކާ 2000 ޓަނުގެ ތިން ތާންގީ އާއި 1000 ޓަނުގެ ތިން ތާންގީ އާއި އެކު ޖުމްލަ 6 ތާންގީ ބެހެއްޓުމާއި، ބްރައިން ރިޖެކްޓް ހޮޅި އެޅުމާއި އަދި 100 ކިލޯވޮޓްގެ ސޯލާ ޕީވީ ސިސްޓަމް ގާއިމުކުރުން ހިމެނެ އެވެ.
މީގެ އިތުރުން އައްޑޫގެ އެހެން އަވަށްތަކާ ވަކިން އޮންނަ ހުޅުމީދޫގައި ވެސް އާރްއޯ ފެސިލިޓީ ބިލްޑިން ގާއިމުކުރުމާއި ބޯހޯ ތޮރުފުމާއި، ދުވާލަކު 350 ޓަނުގެ ބޯފެން އުފެއްދޭ ދެ އާރްއޯ ޕްލާންޓް ބެހެއްޓުމާއި ފެން ރައްކާކުރުމަށްޓަކާ 1000 ޓަނުގެ ތިން ތާންގީ ބެހެއްޓުމާއި، ބްރައިން ރިޖެކްޓް ހޮޅި އެޅުމާއި އަދި 75 ކިލޯވޮޓްގެ ސޯލާ ޕީވީ ސިސްޓަމް ގާއިމުކުރުން ހިމެނޭ ކަމަށެވެ.
މަޝްރޫއުގެ ތެރެއިން ހިތަދު އާއި ހުޅުމީދު އަށް ފެން ތަހުލީލު ކުރުމަށް ބޭނުންވާ ސާމާނު ފޯރުކޮށް ދިނުމާއި، މަރަދޫ އާއި މަރަދޫފޭދޫ އަދި ފޭދޫގައި ފެން ރައްކާކުރުމަށްޓަކާ 1000 ޓަނުގެ ހަތަރު ތާނގީ ބެހެއްޓުމަށް ހަމަޖެހިފައިވާ ކަމަށް ވެސް އެމްޑަބްލިއުއެސްސީން ބުނެފައިވެ އެވެ. އަދި ފެނުގެ ނިޒާމު ހިންގައި ބެލެހެއްޓުމަށް ބޭނުންވާ ބޭނުންވާ ތަމްރީނު ޕްރޮގްރާމް ހިންގައި ދިނުމާއި އަދި ސްޕެއާ ފޯރުކޮށް ދިނުން ވެސް މީގެ ތެރޭގައި ހިމެނެ އެވެ.
އައްޑޫގެ ފެނުގެ ނިޒާމަކީ ފެނަކަ އިން ގާއިމުކޮށް، ބަލަހައްޓަމުން އަންނަ ނިޒާމެކެވެ.