ކުރިން މިދިޔަ މަހު ރިލީޒްކުރަން ޕްލޭން ކުރުމަށް ފަހު ފަސްކުރި، ބޮލީވުޑްގެ ތަރި ވަރޫން ދަވަންގެ "ބޭބީ ޖޯން" މި އަހަރުގެ ޑިސެމްބަރުގައި ރިލީޒްކުރަން ނިންމައިފި އެވެ.
ފިލްމުގެ އާ ޕޯސްޓަރެއް އާންމުކޮށް މިއަދު ބުނީ ފިލްމު ސިނަމާތަކަށް އަންނާނީ ޑިސެމްބަރު 25 ގައި ކަމަށެވެ. "ބޭބީ ޖޯން" ގެ ތާރީހަށް މި އައި ބަދަލާ އެކީ، މިހާރު އާމިރު ޚާންގެ "ސިތާރޭ ޒަމީން ޕަރް" އާ ބޮކްސް އޮފީހުގައި ކުރިމަތިލުމަކަށް ދާން ޖެހޭނެ އެވެ.
ވަރޫން ވަރުގަދަ އެކްޝަން ރޯލަކުން ފެންނާނެ "ބޭބީ ޖޯން" އަކީ މިދިޔަ އަހަރު ޝާހްރުކް ޚާންގެ "ޖަވާން" ގެނެސްދިން ޑައިރެކްޓަރު އެޓްލީ އާއި ޕްރޮޑިއުސަރު މުރާދު ކެތާނީ ގުޅިގެން ޕްރޮޑިއުސްކޮށް، ކަލީސް ޑައިރެކްޓްކޮށްފައިވާ އެކްޝަން ޑްރާމެކެވެ. މި ފިލްމަކީ އެޓްލީ ޑައިރެކްޓްކޮށް 2016 ގައި ގެނެސްދިން ތަމަޅަ ފިލްމު "ތެރީ" އަސްލަކަށް ބަލައިގެން ހަދާފައިވާ ފިލްމެކެވެ.
"ބޭބީ ޖޯން" ގެ ކާސްޓްގައި ދެކުނުގެ ބަތަލާ ކީރްތީ ސުރޭޝް، ވަމީގާ ގައްބީ، ޖެކީ ޝްރޮފް، ރާޖްޕަލް ޔާދަވްގެ އިތުރުން ޝީބާ ޗައްޑާ ހިމެނެ އެެވެ. އަދި ފިލްމުގެ ހާއްސަ ފެނިލުމެއްގައި ސާނިއާ މަލްއުތުރާ ވެސް ހިމެނެ އެވެ.