އަނިޔާވެރިކަމާއި ދެކޮޅަށް މަސައްކަތް ކުރުމަށް ނިކުމެ އުޅުއްވަނީ ހިތްވަރާއި އެކުގައި ކަމަށާއި ޖަލުގައި ބަންދުކޮށްފިއްޔާ އުމުރުގައި އެކަނި ހުރެ އަޅުކަން ކުރުމުގެ ޖާގަ ލިބޭނެ ކަމަށް އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ ވިދާޅުވެއްޖެއެވެ.
ރޭ ރާއްޖެ ޓީވީގެ 'ފަލަ ސުރުހީ' ޕްރޮގްރާމްގައި ވާހަކަދައްކަވަމުން އިމްރާން ވިދާޅުވިގޮތުގައި ﷲ އިރާދަ ކުރެއްވިއްޔާ އެބޭފުޅާ އަކީ ފައީސާ އާއި ދިމާޔަށް އެނބުރިގެންދާނެ ބޭފުޅެއް ނޫން ކަމަށާއި ފައިސާ އާއި މަޤާމާއި ބާރު ބޭނުންފުޅު ނަމަ އަނިޔާވެރިކަމާ ދެކޮޅަށް މިހާރު ކުރައްވާ މަސައްކަތް ނުކުރާނެ ކަމަށެވެ.
" އަޅުގަނޑު ފައީސާ އަކާއި ދިމާޔަށް އެނބުރިގެނެއް ﷲ އިރާދަ ކުރެއްވިއްޔާ ނުދާނެ . ފައިސާ އާއި މަޤާމާއި ބާރަށް ކަމަށް ވާނަމަ މި ކުރާ މަސައްކަތް ނުކުރާނަން " އިމްރާން ވިދާޅުވިއެވެ.
މިހާރު މިކުރައްވާ މަސައްކަތަކީ ރާއްޖޭގައި އަނިޔާ ލިބިފައިވާ މީހުން ހިމާޔަތް ކުރުމަށް ހައްޤުތައް ގެއްލިފައިވާ މީހުންގެ ހައްގުތައް ހޯދައި ދިނުމަށް ކުރާ މަސައްކަތް ކަމަށް ވިދާޅުވެ އިމްރާން ވަނީ ކޮންމެ މީހަކަށްވެސް ހައްގު ނޫން ގޮތުގައި ލިބޭ އަނިޔާއެއްގައި އެހީތެރިވާން ޖެހޭނެ ކަން ފާހަގަކުރައްވާފައެވެ.