ރޯޑް ޑިވޮލޮޕްމެންޓް ކޯޕަރޭޝަން (އާރުޑީސީ) އިން ބައެއް މުވައްޒަފުންތަކެއް ވަކިކުރުމަށް ނިންމައިފި އެވެ.
މިކަމާ ގުޅޭ ގޮތުން އެ ކުންފުނީގެ އޮފިޝަލަކު ވިދާޅުވީ އާރުޑީސީގެ ހުޅުމާލޭ ފެސިލިޓީގެ މުވައްޒަފުންގެ ތެރެއިން މި ވަގުތު ކުންފުންޏަށް ބޭނުންވާ މުވައްޒަފުން ފިޔަވައި އެހެން މުވައްޒަފުން ވަކި ކުރުމަށް ނިންމާފައިވާ ކަމަށެވެ. އަދި ހުޅުމާލޭގެ ފެސިލިޓީގައި ހިންގަމުން އަންމަ އެކޮމަޑޭޝަން ފެސިލިޓީގެ މެނޭޖްމެންޓްގެ މަސައްކަތްތައް ހުއްޓާލަން ނިންމާފައިވާ ކަމަށް ވެސް ބުންޏެވެ.
އާރްޑީސީން ބުނީ އެ ބިމަކީ ސަރުކާރުގެ ޕްރޮޖެކްޓްތަކަށް ބޭނުންކުރަން ނިންމާފައިވާ ބިމެއް ކަމަށެވެ.
މުވައްޒަފުންތަކެއް ވަކިކުރަން ނިންމައި އާރުޑީސީން ފޮނުވާފައިވާ މެމޯއެއްގައި ބުނެފައި ވަނީ މުވައްޒަފުންތަކެއް ވަކިކުރަނީ ވަޒީފާއާ ބެހޭ ގާނޫނުގެ 21 ވަނަ މާއްދާއަށް ރިއާޔަތްކޮށެވެ.
ނަމަވެސް އެ މުވައްޒަފަކު ވަޒީފާގައި ޚިދުމަތްކޮށްފައިވާ މުއްދަތަށް އެއް އަހަރު ފުރިފައި ނުވާ ނަމަ އެއް މަސް ދުވަހުގެ ނޯޓިސް ނުވަތަ ނޯޓިސްގެ މުއްދަތަށްވާ ފައިސާ ދޭން ޖެހެ އެވެ.