2023 ވަނަ އަހަރުގެ ރިޔާސީ އިންތިހާބުން ބަލިވުމުން ރައްޔިތުންގެ މަޖިލީހުގެ ތެރެއިން ރައީސް ޑރ. މުހައްމަދު މުއިއްޒުގެ ސަރުކާރު ވައްޓާލުމަށް އެމްޑީޕީން މަސައްކަތް ކުރިކަމަށް ފޭދޫ ދާއިރާގެ ކުރީގެ މެމްބަރު މުހައްމަދު ނިހާދު ތުހުމަތު ކުރައްވައިފިއެވެ.
ސަރުކާރު ހިންގާ ޕީއެންސީން އެޕާޓީގެ ހަރުގޭގައި ރޭ ކުރިއަށް ގެންދިޔަ ޖަލްސާއެއްގައި ވާހަކަ ދައްކަވަމުން ނިހާދު ވިދާޅުވީ، އެމްޑީޕީއަށް ރިޔާސީ އިންތިހާބު ގެއްލުމުން އެމްޑީޕީން ސުޕަ މެޖޯރިޓީގެ ބޭނުން ނަހަމަގޮތުގައި ހިފައި ރައީސް މުއިއްޒުގެ ސަރުކާރަށް އުނދަގޫކުރަން ބޭނުންވި ކަމަށެވެ. އަދި މަޖިލީހުގެ ތެރެއިން ރައީސް މުއިއްޒުގެ ވެރިކަން ވައްޓާލަން މަސައްކަތް ކުރިކަމަށް ތުހުމަތު ކުރެއްވިއެވެ.
އެގޮތުން ރައްޔިތުންގެ މަޖިލީހުގެ އާންމު ކޮމިޓީގައި ތިއްބެވި މެންބަރުން ބަދަލުކޮށް، އެބޭފުޅުން ބޭނުންފުޅުވާ ގޮތަކަށް ވޯޓު ދޭނެ މެމްބަރުން ކޮމިޓީއަށްލި ކަމަށެވެ. އަދި މަޖިލީހުގެ ގަވައިދު ބަދަލުކޮށް، މަޖިލިސްގެ ޗުއްޓީ 15 ދުވަސް އިތުރު ކުރިކަމަށާއި، މަޖިލިސް އިންތިހާބު ނިމުމުން ލިބޭ މުއްދަތު ތެރޭގައި ރައްޔިތުންގެ މަޖިލީސް ބޭނުން ކޮށްގެން ސަރުކާރަކީ އިތުބާރު ނެތް ކަމުގެ ސަރުކާރެއް ކަމަށް ނިންމަން މަސައްކަތް ކުރިކަމަށެވެ.
މީގެއިތުރުން މިއަހަރަށް ލަފާކޮށް ހުށަހެޅި ބަޖެޓްގެ ތެރެއިންވެސް މި ސަރުކާރަށް އުނދަގޫކުރުމަށް މަސައްކަތްކުރިކަމަށް ނިހާދު ވިދާޅުވިއެވެ.
އެމްޑީޕީން މަސައްކަތްކުރި ގޮތް މަޖިލީހުގެ ޔައުމިއްޔާއިން ފެންނާނެކަން ފާހަގަކޮށް ނިހާދު ވިދާޅުވީ އެމްޑީޕީން އެ މަސައްކަތް ފެށުމުން އޭނާ ސަރުކާރުގެ ދިފާއުގައި ނިކުތްކަމަށެވެ.