މާލޭގެ ޖަމީލުދީދީ މިސްކިތުގެ ދޮރުގެ ތަޅުގައި ރޯކޮށްލައި، ވައްކަން ކުރަން އުޅުނު މައްސަލައިގައި ދެ މީހަކު ހައްޔަރުކޮށް ބަންދަށް މުއްދަތު ޖަހައިފި އެވެ.
އެ މައްސަލަގައި ހައްޔަރުކުރީ ތިނަދޫ/އަންދާޒާ، މުހައްމަދު ނިޝާން އާއި ހދ. ނޭކުރަންދޫ/ބޯގަންވިލާ، މުހައްމަދު އަސްފާގެވެ.
އެ ދެ މީހުންގެ މައްޗަށް ކޮށްފައިވާ ތުހުމަތުތަކުގެ ތެރޭގައި މި މަހުގެ 23 ވަނަ ދުވަހު މިސްކިތުގެ ދޮރަކަށް ގެއްލުން ދީގެން ވައްކަން އުޅުމުގެ ތުހުމަތު ހިމެނެ އެވެ. މި މައްސަލައިގައި އެ މީހުންގެ ބަންދަށް ކްރިމިނަލް ކޯޓުން 15 ދުވަސް ޖަހާފައިވާ އިރު، އެ ދެ މީހުންނަކީ ވެސް މުޖުތަަމައަށް ދޫކޮށްފައި ބައިތިއްބައިފި ނަމަ ނުރައްކާތެރި ވެދާނެ ކަމަށް ބަންދު އަމުރުގައި ބުނެފައިވެ އެވެ.
މި ފަހަކަށް އައިސް މާލޭގެ މިސްކިތްތަކުން ވައްކަންކުރުމާއި މިސްކިތްތަކަށް ގެއްލުން ދިނުމުގެ މައްސަލަތައް ވަރަށް ބޮޑަށް އިތުރުވެފައިވެ އެވެ.
އެގޮތުން މި މަހު އެކަނިވެސް އީދު މިސްކިތުން 10 ފަންކާ ވަގަށް ނަގާފައިވެ އެވެ.