މަސްވެރިންނަށް ނުދެވި ހުރި ފައިސާ މިއަދު ދިނުމަށް ސަރުކާރުން މަސައްކަތް ކުރަމުންދާ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކަމްޕެނީ ލިމިޓެޑް (މިފްކޯ) އިން ބުނެފިއެވެ.
މިފްކޯއިން ބުނެފައިވަނީ އޮޑިވެރިންގެ އަތުން ގަނެފައިވާ ކަޅުބިލަމަހަށް ނުދައްކާވާ ފައިސާ މިއަދު ދެއްކުމަށް ސަރުކާރުން މަސައްކަތް ކުރަމުންދާކަމުގެ މައުލޫމާތު ލިބިފައިވާ ކަމަށެވެ. އެގޮތުން 52 މިލިއަން ރުފިޔާ ދިނުމަށް މަސައްކަތް ކުރަމުންދާ ކަމަށް މައުލޫމާތު ލިބިފައިވާ ކަމަށް ވެސް މައުލޫމާތު ދީފައިވެއެވެ.
މިފްކޯ އިން ބުނެފައިވަނީ، މަސްވެރިންނަށް ފައިސާ ދިނުމަށް ސަރުކާރުން މަސައްކަތް ކުރަމުންދާއިރު، މިއަދު އެ ފައިސާ ދޫކުރެވޭނެ ކަމުގެ ސީދާ ޔަގީންކަން މިފްކޯއަށް އަދި ނުލިބޭ ކަމަށެވެ.
އައްޑޫގެ މަސްވެރިންނަށް ފާއިތުވި ދެ މަހު ލިބެން ޖެހޭ ފައިސާ ލިބުން ލަސްވެގެން ހުކުރު ދުވަހުން ފެށިގެން ހުޅުމީދޫގައި ހުންނަ މިފްކޯގެ ފިޝަރީޒް ކޮމްޕްޕެލްސްގައި ވަނީ މުޒާހަރާ ކޮށްފައެވެ. އައްޑޫގެ މަސްވެރިން ކުރަމުން އަންނަ އިހުތިޖާޖުގައި މަސްވެރިންގެ އެންމެ ބޮޑު ޑިމާންޑަކީ ފާއިތުވި ދެ މަހާއި 17 ދުވަހުގެ ތެރޭގައި ކިރުވި މަހަށް ލިބެން ޖެހޭ ފައިސާ ވީހާ ވެސް އަވަހަކަށް ދިނުމާއި ކުރިއަށް އޮތް ތަނުގައި ކިރުވާ މަހަށް އެންމެ ލަސްވެގެން 15 ދުވަހުގެ ތެރޭގައި ފައިސާ ލިބޭނެ އިންތިޒާމުތަކެއް ހަމަޖައްސައި ދިނުމެވެ.