އިންޑިއާގެ ސިނަމާގެ ލެޖެންޑުންތަކެއް ކަމަށްވާ ޑައިރެކްޓަރު މަނީ ރަތުނަމް އާއި އެކްޓަރު ކަމަލް ހަސަންގެ އާ ފިލްމު "ތަގް ލައިފް" އިން ބޮލީވުޑްގެ ޒުވާން އެކްޓަރު ރޯހިތު ސަރަފަށް ފުރުސަތު ލިބިއްޖެ އެވެ.
ޕިންކްވިލާ އިން ބުނީ އެ ފިލްމުގެ ރޯލަކަށް 27 އަހަރުގެ އެކްޓަރު މިހާރު ސޮއިކޮށްފައިވާ ކަމަށެވެ. އެކަމަކު އަދި "ތަގް ލައިފް" ގެ ޓީމުން އެކަން ކަށަވަރުކޮށް ނުދެ އެވެ.
މިހާތަނަށް ގިނައިން ސަޕޯޓިން ރޯލުތަކެއް ކުޅެފައިވާ ރޯހިތުގެ އެންމެ ފަހުގެ ފިލްމަކީ އޭނަ ލީޑުން ފެންނަ އަދި މި މަހުގެ 21 ގައި ރިލީޒްކުރި "އިޝްގް ވިޝްގް ރީބައުންޑް" އެވެ. ރޯހިތު ކުޅެފައިވާ ފިލްމުތަކުގެ ތެރޭގައި އާލިއާ ބަޓްގެ "ޑިއާ ޒިންދަގީ"، ރާނީ މުކަރްޖީގެ "ހިޗްކީ"، ޕްރިޔަންކާ ޗޯޕްޅާގެ "ދަ ސްކައި އިޒް ޕިންކް" އަދި ރިތިކް ރޯޝަންގެ "ވިކްރަމް ވޭދާ" ހިމެނެ އެވެ.
އޭނަގެ ކުރިއަށް ހުރި ފިލްމުތަކުގެ ތެރޭގައި ވަރޫން ދަވަންގެ "ސަނީ ސަން ސަންސްކާރީ ކީ ތުލްސީ ކުމާރު" ހިމެނެ އެވެ.
ކާމިޔާބު އެތައް ފިލްމެއް ގެނެސްދީފައިވާ ތަމަޅަ ޑައިރެކްޓަރު މަނީ ރަތުނަމްގެ "ތަގު ލައިފް" އިން ރޯހިތަށް ފުރުސަތު ލިބުނު އިރު، އޭނަ ކުރިން ވެސް ތަމަޅަ ފިލްމެއް ކުޅުނެވެ. އެއީ 2021 ގެ "ކަމާލީ ފްރޮމް ނަޑުއްކަވޭރީ" އެވެ.
މި އަހަރު ސިނަމާތަކަށް ގެންނަން ޕްލޭންކޮށްފައި އޮތް "ތަގް ލައިފް" އަކީ 35 އަހަރު ފަހުން މަނީ ރަތުނަމްއާ އެކީ ކަމަލް ހަސަން މަސައްކަތްކުރާ ފުރަތަމަ ފިލްމެވެ. މި ގޭންގްސްޓާ އެކްޝަން ޑްރާމާގެ ކާސްޓްގައި ދެކުނާއި ބޮލީވުޑްގެ މަސްހުނި ކާސްޓެއް ހިމެނެ އެވެ. އެގޮތުން ފިލްމުން ފެންނާނެ ބޮލީވުޑްގެ ފަންނާނުންގެ ތެރޭގައި ސާނިއާ މަލްއުތުރާ، އަލީ ފަޒަލް އަދި ޕަންކަޖް ޓްރިޕަތީ ހިމެނެ އެވެ.
މަނީ ރަތުނަމްގެ އެންމެ ފަހުގެ ފިލްމަކީ ދެ ބަޔަކަށް ގެނެސްދިން "ޕޮނިޔިން ސެލްވަން" އެވެ. އައިޝްވާރިއާ ރާއީ ބަތަލާގެ ރޯލު ކުޅުނު ފިލްމުގެ ދެވަނަ ބައި ރިލީޒްކުރީ މިދިޔަ އަހަރުގެ އެޕްރީލްގަ އެވެ.