އަގުބޮޑު ގަޑިއެއް ވަގަށް ނަގައި ވިއްކުމުން ޖަލަށް

98،000 ރުފިޔާގެ ގަޑިއެއް ވަގަށްނަގައި، އެ ގަޑި ވިއްކި މީހަކާއި ކޭޝްކާޑަކުން ވަގަށް ވިޔަފާރިކުރި މައްސަލައެއްގައި ދެ މީހަކު ޖަލަށްލާން ހުކުމް ކޮށްފިއެވެ.

މި މައްސަލައިގައި ޕްރޮސިކިއުޓާ ޖެނެރަލްގެ އޮފީހުން ދައުވާ އުފުލާފައިވަނީ އަބްދުލްޣައްފާރު ޢަބްދުލްޣަފޫރު މާލެ، މއ. ލެއްގި، މުހައްމަދު އިލްހާމް ސ. ފޭދޫ، ފެހިވިދުވަރު އަދި އަހްމަދު ޝައިރަފް އަބްދުއްރަހީމް ދަފްތަރު ނަންބަރު 5624 ގެ މައްޗަށެވެ. މި ތިން މީހުންގެ މައްޗަށް އުފުލާފައިވަނީ އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާއެވެ.

މި މީހުންގެ މައްޗަށް ދައުވާ އުފުލާފައިވަނީ، 7 އޮކްޓޫބަރު 2021 ވަނަ ދުވަހު މާލޭގެ އެޕާޓްމަންޓަކުން 98،000 ރުފިޔާގެ ނޫކުލައިގެ އޮމެގާ ބްރޭންޑްގެ ގަޑިއަކާއި އެހެންވެސް އެއްޗެހި ވަގަށް ނަގާފައިވާ މައްސަލައެއްގައެވެ. މި ގަޑި ވަގަށް ނެގުމަށްފަހު ވަނީ އެހެންމީހަކަށް 3000 ރުފިޔާއަށް ވިއްކާފައެވެ. ގަޑި ވަގަށްނަގާ ވިއްކި މައްސަލައިގައި އަބްދުލްޣައްފާރު ޢަބްދުލްޣަފޫރުގެ މައްޗަށް ދައުވާ ސާބިތުވާ ކަމަށް ކަނޑައަޅާފައިވެއެވެ.

މީގެއިތުރުން އެގެއިން ވަގަށްނެގި ވިސާ ޑެބިޓް ކާޑުން 1563 ރުފިޔާގެ ވިޔަފާރިކުރި މައްސަލައިގައި މުހައްމަދު އިލްހާމްގެ މައްޗަށް ކުށް ސާބިތުވާ ކަމަށްވެސް ކަނޑައަޅާފައިވެއެވެ. އެހެންނަމަވެސް އަހްމަދު ޝައިރަފް އަބްދުއްރަހީމްގެ މައްޗަށް ކުށް ސާބިތުވެފައެއް ނުވެއެވެ.

މި މައްސަލައިގައި އިއްޔެ ކްރިމިނަލް ކޯޓުން ކުރި ހުކުމުގައި ވަނީ އަބްދުލްޣައްފާރު ޢަބްދުލްޣަފޫރުގެ މައްޗަށް 2 އަހަރާއި 9 މަހާއި 18 ދުވަހުގެ ޖަލު ހުކުމެއް އިއްވާފައެވެ. އަދި މުހައްމަދު އިލްހާމްގެ މައްޗަށް ވަނީ 9 މަހާއި 18 ދުވަހުގެ ޖަލު ހުކުމެއް އިއްވާފައެވެ.