ނ. މަނަދޫގައި އަނިޔާވެރި ގޮތަކަށް މަރާލާފައި އޮއްވައި ފެނުނު، އެރަށު އަންނާރުމާގޭ ނައީމާ މޫސާގެ މަރުގެ މައްސަލައިގައި ބައެއް ހެކި ސިއްރު ކުރަން އަމުރު ކޮށްފިއެވެ.
7 އޭޕްރިލް 2023 ދުވަހު، އަނިޔާވެރި ގޮތަކަށް މަރާލާފައި އޮއްވާ ފެނުނު، ނައީމާ މޫސާގެ މަރުގެ މައްސަލައި ދައުވާ ކޮށްފައިވަނީ ފެހިވިލާގެ، ނ. މަނަދޫ، އަހުޒަމް އަބްދުލްޝަކޫރު، ވިނަރެސް، ނ. މަނަދޫ، ހުސައިން ފަވާޒު، އަދި ފިނިފެންމާގެ، ނ. މަނަދޫ، އަބްދުލްވާހިދު ރިފާސްއަށެވެ.
މި މީހުންގެ މައްޗަށް ކުރަނީ ތޫނު އެއްޗެއް ބޭނުން ކޮށްގެން ގަސްތުގައި މީހަކު މެރުމާއި، އަދުލު އިންސާފު ގާއިމު ކުރުމަށް ހުރަސް އެޅުމާއި، މައްޔިތާގެ ބޭނުން ނަހަމަގޮތުގައި ހިފުމުގެ ކުށުގެ ދައުވާއެވެ.
މި މައްސަލައިގައި މިއަދު ކުރިއަށް ގެންދިޔަ ޝަރީއަތުގެ އަޑުއެހުމުގައި ދައުލަތުން ވަނީ ބައެއް ހެކި ސިއްރުކޮށްދިނުމަށް އެދިފައެވެ. އެގޮތުން ބައެއް ސިއްރު ހެކިންގެ މައުލޫމާތު އާންމުވެއްޖެނަމަ އެމީހުންނަށް ނުރައްކަލެއް އޮވެދާނެތީ އެ ހެކިތައް ސިއްރުކުރުމަށް އެދިފައިވެއެވެ. މީގެއިތުރުން ނައީމާ މަރާލާފައި އޮތް މަންޒަރު ފެންނަ ފޮޓޯ އަދި ވީޑިއޯތައް ހަމައެކަނި ކޯޓުގައި ތިބެ ބެލޭގޮތަށް ސިއްރުކުރަން އެދިފައިވެއެވެ.
އެހެންކަމުން މައްސަލަ ބައްލަވާ ގާޒީ އަލީ އާދަމް ވަނީ ބައެއް ހެކި ސިއްރުކޮށް އަދި ބައެއް ހެކި ހަމައެކަނި ކޯޓުގައި ބެލޭގޮތަށް ސިއްރު ކޮށްފައެވެ.