އޮގަސްޓް މަހު އޮލިމްޕަހަށް ގެންނަން ނިންމާފައިވާ ފިލްމު "ކަމަނަ" ގެ ރަސްމީ ޕޯސްޓަރު މިއަދު ދައްކާލައިފި އެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ މި ފިލްމަކީ "ހައްދު" އާއި "ވިޝްކާ" ފަދަ މަގުބޫލު ފިލްމުތަކުގެ ސްކްރީން ރައިޓަރު މަހުދީ އަހުމަދު އަހުމަދުގެ ސްކްރީންޕްލޭއަށް ހުސައިން މުނައްވަރު (ހުސައިން ކިޑް) ޑައިރެކްޓްކޮށްފައިވާ އަސަރު ގަދަ ލޯބީގެ ވާހަކައެއްގެ ތެރެއިން ގެވެށިއަނިޔާގެ ހިތްދަތި ހާދިސާތަކެއް ދައްކުވައި ދޭނެ ފިލްމެކެވެ.
"ކަމަނާ" އަކީ މަހުދީގެ ސްކްރީންޕްލޭއަކަށް ހުސައިން ޑައިރެކްޓްކުރި ތިން ވަނަ ފިލްމެވެ. އަނެއް ދެ ފިލްމަކީ 2011 ގެ "ސަޒާ" އާއި 2013 ގެ "ދިލަކަނި" އެވެ.
އޮގަސްޓް 27 ގައި ޕްރީމިއާކުރަން ހަމަޖެހިފައިވާ "ކަމަނާ" ގެ މައިގަނޑު ކާސްޓްގައި ހިމެނެނީ މަރިޔަމް އައްޒަ އާއި ޔޫސުފް ޝަފީއު (ޔޫއްޕެ) ގެ އިތުރުން އައިމިނަތު ރަޝްފާ (އާޝާ) އެވެ. އިތުރު ކާސްޓުންގެ ތެރޭގައި މުހައްމަދު މަނިކު، އަހުމަދު ނިމާލު، މުހައްމަދ ރަޝީދު (ދަރާ) އަދި ނަތާޝާ ޖަލީލު ހިމެނެ އެވެ.
ވަރަށް ގިނަ ބަޔަކު މިހާރު ތިބީ "ކަމަނާ" ގެ ޓްރެއިލާގެ އިންތިޒާރުގަ އެވެ.
މި ފިލްމަކީ "ކަމަނާ" އަކީ ހުސައިންގެ އަމިއްލަ ޕްރޮޑަކްޝަން ހައުސް ކިޑް ޕްރޮޑަކްޝަނާއި ޕްރޮޑިއުސަރު އަލީ ޝާނީޒް އަހުމަދުގެ ސެޓާން ސްޓޫ ގުޅިގެން ގެނެސްދޭ ފިލްމެކެވެ.