ކަރެކްޝަންސްގެ އޮފިސަރުންތަކެއް ރިޝްވަތު ނަގައިގެން މާފުށީ ޖަލަށް ފޯނާއި ޑްރަގްސް އެތެރެކުރާ މައްސަލައިގައި ފުލުހުން ހާއްސަ އޮޕަރޭޝަނެއް ފަށައިއފިއެވެ.
ފުލުހުން މިހާރު ކުރިއަށްގެންދާ ޕްރެސް ކޮންފަރެންސްގައި ހޯމް މިނިސްޓަރު އަލީ އިހުސާން ވިދާޅުވީ ޔުނިފޯމްއެޅި އެއްވެސް އޮފިސަރަކު ފައިސާ ނަގާ ފައިސާއަށްޓަކައި ޔުނިފޯމް ވިއްކާނަމަ އެ ކަމެއް ޓޮލަރޭޓް ނުކުރާނެ ކަމަށެވެ.
އެގޮތުން ޖަލުން ފޯނު ފެންނަ މައްސަލައިގައި، މަގާމާ ހަވާލުވުމަށްފަހު ހާއްސަ މަސައްކަތްތަކެއް ކުރެވުނުކަން ފާހަގަކޮށް މިނިސްޓަރު އިހުސާން ވިދާޅުވީ، ތިން މަސްކުރިން ފުލުހުންގެ އިންޓެލިޖެންސުން، ޖަލުގެ އޮފިސަރުން ބައިވެރިވެގެން މަސްތުވާތަކެތި އަދި ފޯނު ޖަލު ގޮޅިއަށް ވައްދާކަމަށް ޝައްކުކުރެވޭ ކަމުގެ މައުލޫމާތު ދީފައިވާ ކަމަށެވެ. އަދި މި މައުލޫމާތާ ގުޅިގެން ފުލުހުންގެ އިންޓެލިޖެންސްގެ ހާއްސަ އޮޕަރޭޝަނެއްގެ ފައިޑިންސް އިއްޔެ ލިބިފައިވާ ކަމަށް އިހުސާން ވިދާޅުވިއެވެ. މިނިސްޓަރު އިހުސާން ވިދާޅުވީ މިކަމާ ގުޅިގެން ފުލުހުން މިރޭ ހާއްސަ އޮޕަރޭޝަނެއް ފަށާފައިވާ ކަމަށެވެ.
މި ޕްރެސް ކޮންފަރެންސްގައި އެސިސްޓެންޓް ޕޮލިސް ކޮމިޝަނަރު އަބްދުﷲ ޝަރީފް ވިދާޅުވީ މާފުށީގައި މި މައްސަލައާ ގުޅިގެން މިރޭ ހާއްސަ އޮޕަރޭޝަނެއް ފަށާފައިވާ ކަމަށާއި އަދި ކަރެކްޝަންސްގެ ބައެއް އޮފިސަރުން ހައްޔަރުވެސް ކޮށްފައިވާ ކަމަށެވެ. މި 18 އޮފިސަރުންނަކީ ޖޫނިއާ ރޭންކްތަކުގެ އޮފިސަރުންކަން ފާހަގަކުރެވޭ ކަމަށްވެސް ބުނެފައިވެއެވެ.
ޖަލަށް ފޯނާއި ޑްރަގްސް ވައްދާ މައްސަލައިގައި 18 މުވައްޒަފަކު އުޅުނުކަން ފާހަގަކުރެވުނު ކަމަށާއި އެއް މުވައްޒަފެއްގެ އެކައުންޓަށް 24 މިލިއަން ރުފިޔާ ވަދެފައިވާ ކަމަށް މައުލޫމާތު ދީފައިވެއެވެ. އަދި މި 18 މުވައްޒަފުންގެ އެކައުންޓްތަކުން 73.6 މިލިއަން ރުފިޔާ ދައުރުވެފައިވާ ކަމަށާއި މި ފައިސާގެ އަދަދުތަކަކީ 2023 ޖެނުއަރީން ފެށީގެން ފާހަގަ ކުރެވިފައިވާ މުއާމަލާތްތަކެއް ކަމަށެވެ.
މި 18 މުވައްޒަފުންގެ ތެރެއިން 6 ފަރާތެއް އަމިއްލައަށް ކަރެކްޝަންސްގެ ވަޒީފާއިން މީގެކުރިން ވަކިވެފައިވާކަން ފާހަގަކޮށް މިނިސްޓަރު އިހުސާން ވިދާޅުވީ އެމީހުންނަށްވެސް ފިޔަވަޅު އަޅާނެ ކަމަށެވެ.
ކަރެކްޝަންސްގެ އޮފިސަރުންގެ އެކައުންޓްތަކަށް ފައިސާ ޖަމާވެފައިވާކަން ފާހަގަ ކުރެވެނީ ޖަލުގައި މިހާރު ތިބި އަދި ކުރިން ތިބި ގައިދީންގެ އެކައުންޓުތަކުން ކަމަށާއި އަދި ކުށުގެ މާހައުލުގައި އުޅޭ މީހުންގެ އެކައުންޓްތަކުން ވެސް ފައިސާ ޖަމާވެފައިވާކަން ފާހަގަ ކުރެވިފައިވާ ކަމަށްވެސް މިނިސްޓަރު އިހުސާން ވިދާޅުވިއެވެ.