އެސްޓީއޯގެ އަހަރީ އާންމު ޖަލްސާ އަންނަ މަހު ބާއްވަން ނިންމައިފި އެވެ.
އެ ކުންފުނިން މިހާރު ވަނީ އަންނަ މަހުގެ 12 ގައި އަހަރީ ޖަލްސާ ބާއްވަން ނިންމައި ހިއްސާދާރުންނަށް ނޯޓިސް ވެސް ފޮނުވައިފަ އެވެ.
އެސްޓީއޯއިން ބުނީ އަހަރީ އާންމު ޖަލްސާ އޮންނާނީ ހުޅުލެ ނީރި ލައުންޖުގައި ކަމަށެވެ. އެ ޖަލްސާގައި ހިއްސާދާރުންނަށް ތިން ގޮތަކަށް ބައިވެރިވެވޭނެ އެވެ. އެއީ ޖަލްސާއަށް ހާޒިރުވާ ގޮތަށް ނުވަތަ ޕްރޮކްސީ މެދުވެރިކޮށް ނުވަތަ މައިކްރޮސޮފްޓް ލައިވް އިވެންޓް މެދުވެރިކޮށް އޮންލައިންކޮށެވެ. ޖަލްސާގައި އެސްޓީއޯގެ ޕޯޓަލް މެދުވެރިކޮށް ރަޖިސްޓްރީ ވެވޭނެ އެވެ. އަދި ލިންކް މެދުވެރިކޮށް ޖަލްސާއާ ބެހޭ އިތުރު މައުލޫމާތު ލިބޭނެ ކަމަށް އެސްޓީއޯއިން ބުންޏެވެ.
އެ ޖަލްސާގައި ބައިވެރިވެވޭނީ އިއްޔެގެ ނިޔަލަށް ކުންފުނީގެ ހިއްސާދާރުންގެ ދަފުތަރުގައި ހިމެނޭ ފަރާތްތަކަށެވެ.
އަހަރީ އާންމު ޖަލްސާގައި މިދިޔަ އަހަރު ޕާފޯމަންސް ރިޕޯޓު ހުށަހެޅުމާއި، ހިއްސާދާރުން ހުށަހަޅާފައިވާ ސުވާލުތަކަށް ޖަވާބު ދިނުމުގެ އިތުރުން ޖަލްސާގައި ފާސްކުރުމަށް ހުށަހަޅާ އައިޓަމްތަކަށް ވޯޓަށް އަހާނެ ކަމަށް އެސްޓީއޯ އިން ބުންޏެވެ.