ޔުނިފޯމް އޮފިސަރުން ރިޝްވަތު ނަގައި އެ ފައިސާއަށްޓަކައި ޔުނިފޯމް ވިއްކާލުމަކީ ސަރުކާރުން ޓޮލަރޭޓުކުރާނެ ކަމެއް ނޫން ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.
ރިޝްވަތު ނަގައިގެން ޖަލުގައިއި ތިބޭ ގައިދީންނަށް މަސްތުވާތަކެތި ވިއްކާ، ކަރެކްޝަންސް އޮފިސަރުންގެ ނެޓުވޯކެއް ފުލުހުން އަތުލައިގަތް ކަން ހާމަކުރުމަށް ރޭ ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ, އެފަދަ ކަންކަމަކީ ބަލައިގަނެވޭނެ ކަމެއް ނޫން ކަމަށެވެ.
އިހުސާން ވިދާޅުވީ ހާއްސަކޮށް ޔުނީފޯމު އެޅި މުއައްސަސާތަކުގެ އޮފިސަރުންނަކީ އިސްލާމް ދީނާއި ރާއްޖޭގެ ގާނޫނުތަކާއި ގަވައިދުތަކަށް ހުރުމަތްތެރިކޮށް ހިތުމަށް ހުވާކޮށްގެން ތިބޭ ބަޔަކަށްވާތީ އެފަދަ މީހުންގެ ފަރާތުން ނޭދެވޭ އަމަލުތައް ފެނުމަކީ އެއްވެސް ވަރަކަށް ބަލައިގެނެވޭނެ އަމަލުތަކެއް ނޫން ކަމަށެވެ.
އެހެންވެ ޝްވަތު ހުށަހެޅި މީހުންނާއި އޭގައި ހިފި މީހުންނާ މެދު ގާނޫނީ ގޮތުން އެޅެން އޮތް އެންމެ ހަރުކަށި ފިޔަވަޅު އަޅުއްވާނެ ވިދާޅުވި އެވެ.
މިހާތަނަށް މި ކަމުގައި ބައިވެރިވި 18 ޖަލު އޮފިސަރަކު އަތުލައިގެންފައެވެ. އެގެތެރޭގައި ހިމެނެނީ ޖޫނިއާ ރޭންކުތަކުގެ އޮފިސަރުންނެވެ.އެ މީހުންގެ އެކައުންޓުތަކަށް މިދިޔަ އަހަރެއްހާ ދުވަހުގެ ތެރޭގައި 73.6 މިލިއަން ރުފިޔާ ޖަމާވެފައިވާ ކަމަށް ރޭގެ ނޫސްވެރިންގެ ބައްދަލުވުމުގައި ބުނެފައިވެ އެވެ.
މިނިސްޓަރު އިހުސާން ވިދާޅުވީ އޮފިސަރުންގެ އެކައުންޓުތަކަށް މިލިއަނުން ފައިސާ ވަން އިރު، އެ މައުލޫމާތު މިހާތަނަށް ނުލިބި ފެއިލްވި ގޮތް ވެސް ތަހުގީގު ކުރާނެ ކަމަށެވެ.