ކުރީގެ ސަރުކާރުން ފެށި "ބިންވެރިޔާ" ސްކީމްގެ ދަށުން ހުޅުމާލެ އިން މިހާތަނަށް ޖުމްލަ 594 ގޯތި ކަނޑައި ހަވާލުކޮށްފި އެވެ.
ހައުސިން މިނިސްޓްރީން އިއްޔެ ބުނީ ހުޅުމާލެ ދެވަނަ ފިޔަވަހިން ވެސް އިތުރު 45 ގޯތި ހަވާލުކޮށްފައިވާ ކަމަށެވެ. އެއާއެކު ޖުމްލަ 538 ގޯތި ދެވަނަ ފިޔަވަހިން މިހާތަނަށް ވަނީ ހަވާލުކޮށްފަ އެވެ.
މިނިސްޓްރީން ބުނީ މި އަހަރުގެ ޖެނުއަރީ މަހުން ފެށިގެން މިހާތަނަށް 119 ގޯތި ހަވާލުކޮށްފައިވާ އިރު، ހަވާލުކުރެވުނު 594 ގޯތީގެ ތެރޭގައި ކުރީ ސަރުކާރުން ގުޅިފަޅުން ހަވާލުކޮށްފައިވާ 11 ގޯއްޗެއް ވެސް ހިމެނޭ ކަމަށެވެ.
"ބިންވެރިޔާ" ސްކީމްގެ ދަށުން ހުޅުމާލެ ދެކާއި ތިނެއް އާއި ގުޅިފަޅު އަދި ގިރާވަރުފަޅުން ފުރަތަމަ ބުރުގައި 9،001 ގޯތި ދޫކުރުމަށް ނިންމައި، ގޯތި ލިބުނު މީހުންނަށް ރަޖިސްޓްރީ ވެސް ދޫކޮށްފައިވެ އެވެ. އަދި މިހާރު ހިއްކާ ނިމިފައި ހުރި ބިންތަކުން ބިން ކަނޑައި ބިން ހަވާލު ވެސް ކުރި އެވެ. ހުޅުމާލެ ފޭސް ތިނެކާއި ގުޅިފަޅު އަދި ގިރާވަރުފަޅުގެ ބިން ހިއްކާ ނުނިމުނަސް ވަނީ ގަވާއިދަށް ބަދަލު ގެނެސްގެން ބިމުގެ ރަޖިސްޓްރީ ވެސް އޭރު ހަވާލުކޮށްފަ އެވެ.
ރައީސް ޑރ. މުހައްމަދު މުއިއްޒުގެ ސަރުކާރުން ވަނީ ގުޅީފަޅުން އިތުރަށް ބިން ހިއްކަން އިތުރުކުރާ ބިމުން ވެސް ގޯތި ދޭން ނިންމައިފަ އެވެ. އެގޮތުން އެތަނުން 1،347 ގޯތި ކަނޑަން ނިންމައި، ކުރީގެ ސަރުކާރުގައި ގިރާވަރުން ގޯތި ލިބުނު މީހުންގެ ތެރެއިން ގުޅީފަޅަށް ބަދަލުކުރަން ބޭނުންވާ މީހުންނަށް އެ ފުރުސަތު ވެސް ހުޅުވާލި އެވެ.