އިންޑިއާގެ މަޝްހޫރު ޓީވީ ބަތަލާ ހީނާ ޚާނަށް އުރަމަތީގެ ކެންސަރު ޖެހިގެން ފަރުވާ ހޯދަން ފަށައިފި އެވެ.
މި ވާހަކަ އިންސްޓަގްރާމްގައި މިއަދު ހިއްސާކޮށް 36 އަހަރުގެ ބަތަލާ ބުނީ މިހާރު ހުރީ ބަލީގެ ތިން ވަނަ ސްޓޭޖްގައި ކަމަށާއި ފަރުވާގެ ކަންކަން ވަރަށް ރަނގަޅަށް ކުރިއަށްދާ ކަމަށެވެ. އެހެންވެ ބަލިންކޮށް ސަލާމަތްވެ ދުޅަހެޔޮ ސިއްހަތެއްގައި އެނބުރި، ކުރިއަށް ވުރެ ހިތްވަރު ގަދަކޮށް އަންނާނެ ކަމަށް ބުންޏެވެ.
އުރަމަތީގެ ކެންސަރަށް ފަރުވާ ހޯދާކަން ހީނާ ހިއްސާކުރުމާ އެކީ ފޭނުންނާއި ހެޔޮއެދޭ ވަރަށް ގިނަ ބަޔަކު އަންނަނީ އަވަަސް ޝިފާއަކަށް އެދި ހެޔޮ ދުއާ ވެސް ކުރަމުންނެވެ. އަދި ވަރަށް ގިނަ ބަޔަކު އަންނަނީ ހީނާ އަށް ހިތްވަރުން ދެމުންނެވެ.
ދެ ފަހަރެއްގެ މަތިން އުމްރާގެ އަޅުކަން ވެސް އަދާކޮށްފައިވާ ހީނާ އަކީ އިންޑިއާގެ މިހާރުގެ ޓީވީ ތަރިންގެ އެންމެ މަޝްހޫރު އެއް ބަތަލާ އެވެ. އޭނަ އާންމުންގެ ތެރޭގައި މަޝްހޫރުވެގެން ދިޔައީ ސްޓާ ޕްލަސް އިން ގެނެސްދޭ "ޔޭ ރިޝްތާ ކިޔާ ކެހެލާތާ ހޭ" ގައި ކުރިން ކުޅުނު އަކްޝަރާގެ ރޯލުންނެވެ.
ހީނާ ވަނީ "ނާގިން" އާއި "ކަސޯޓީ ޒިންދަގީ ކީ" ސީޒަން ދޭއްގައި ވެސް މަސައްކަތްކޮށްފަ އެވެ. އޭނަގެ ފުރަތަމަ ބޮލީވުޑް ފިލްމަކީ 2020 ގައި ޑައިރެކްޓަރު ވިކްރަމް ބަޓް ގެނެސްދިން ސައިކޮލޮޖިކަލް ތުރިލާ "ހެކްޑް" އެވެ. ރޯހިތު ޖައިސްވާލް ކިޔާ މީހާ ރައްޓެހިވެގެން އުޅޭ ގިނަ އަދަދެއްގެ ވީޑިއޯ ލަވަތަކާއި ވެބް ސީރީޒްތަކެއް ވެސް ކުޅެފައިވެ އެވެ.