ރިޝްވަތު ނަގައިގެން ޖަލުތަކަށް މަސްތުވާތަކެއްޗާއި އެހެން ވެސް ތަކެތި ވައްދާ މައްސަލައެއް ފެންމަތިވެ، އެކަމާ ގުޅިގެން ކަރެކްޝަނަލް ސާވިސްގެ 13 އޮފިސަރަކު ހައްޔަރުކޮށްފި އެވެ.
ފުލުހުން މިއަދު ބުނީ އޮޕަރޭޝަނެއްގައި ހައްޔަރުކުރި އޮފިސަރުންގެ ތެރޭގައި ހިމެނެނީ ކ. މާފުށިން ނުވަ އޮފިސަރުންނާއި، ކ. ކާށިދޫން ދެ އޮފިސަރުންގެ އިތުރުން ހއ. އުތީމުން އޮފިސަރަކާއި މާލެއިން އޮފިސަރެއް ކަމަށެވެ. އެ މީހުން ހައްޔަރުކުރުމަށް ފަހު، އެ މީހުން ދިރިއުޅެމުން ދިޔަ ތަންތަން ބަލާފާސްކޮށްފައިވާ ކަމަށް ވެސް ފުލުހުން ބުންޏެވެ.
ފުލުހުން ރޭ ބޭއްވި ނޫސްވެރިންގެ ބައްދަލުވުމެއްގައި ހޯމްލޭންޑް މިނިސްޓަރު އަލީ އިހުސާން ވިދާޅުވީ ރިޝްވަތު ނަގައިެނ ޖަލަށް މަސްތުވާތަކެތި ވެއްދުމުގެ މައްސަލައިގައި 18 ކަރެކްޝަންސް އޮފިސަރުން ހިމެނޭ ކަމަށާއި އެ އޮފިސަރުންގެ އެކައުންޓްތަށް މިދިޔަ އަހަރު އެކަނި ވެސް 73.3 މިލިއަން ރުފިޔާ ޖަމާކޮށްފައިވާ ކަމަށެވެ.
އިހުސާން ވިދާޅުވީ ޔުނީފޯމު އެޅި އެއްވެސް އޮފިސަރަކު އޭނާގެ މަގާމުގެ ނުފޫޒާއި ލިބިފައިވާ އިމްތިޔާޒުތަކުގެ ބޭނުންކޮށްގެން ފައިސާ ނަގައި ފައިސާއަށްޓަކައި އެ މީހާގެ ޔުނީފޯމު ވިއްކާލުމުގެ މައްސަލަތަކުގައި ހަރުކަށި ފިޔަވަޅު އަޅުއްވާނޭ ކަމަށެވެ.
މިނިސްޓަރު ވިދާޅުވީ އޮފިސަރުންގެ އެކައުންޓުތަކަށް މިލިއަނުން ފައިސާ ވަން އިރު، އެ މައުލޫމާތު މިހާތަނަށް ނުލިބި ފެއިލްވި ގޮތް ވެސް ތަހުގީގު ކުރާނެ ކަމަށެވެ.