ކުރީގެ ސަރުކާރުގެ "ގެދޮރުވެރިޔާ" ސްކީމްގެ ދަށުން ހުޅުމާލެ އިން ދޫކުރަން ނިންމި ފުރަތަމަ 4،000 ފްލެޓުގެ ލިސްޓު މުރާޖާ ކުރުމަށް ފަހު، ފްލެޓް ދޫކުރާނީ ސީދާ ޙައްގުވެރިންނަށް ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.
ފްލެޓްތަކުގެ މަސައްކަތް ކުރިއަށްދާ ގޮތް އިއްޔެ ބައްލަވާލެއްވުމަށް ފަހު މިނިސްޓަރު ވިދާޅިވީ މިހާރު ކުރިއަށް ދަނީ އެ ފްލެޓްތަކަށް ކުރިމަތިލި މީހުންގެ ލިސްޓް މުރާޖާ ކުރުމުގެ މަސައްކަތް ކަމަށާއި އެ މަސައްކަތް ނިމުމުން ފްލެޓް ހަވާލުކޮށް ނިންމާނެ ކަމަށެވެ.
"އިރާދަކުރެއްވިއްޔާ ފްލެޓްގެ ޙައްގުވެރިންނަށް، އަޅުގަނޑު ޔަގީންކަންދެން ތި ބޭފުޅުންނަށް ޙައްގުވެރިންނަށް ނޫން ބަޔަކަށް ފްލެޓުތައް ލިބޭނެ ގޮތަކަށް އަޅުގަނޑުމެން ނުނިންމާނަން." މިނިސްޓަރު ވިދާޅުވި އެވެ.
"ގެދޮރުވެރިޔާ" ސްކީމުގެ ދަށުން 4،000 ފްލެޓް ހަދަމުން އަންނަނީ ފަހި ދިރިއުޅުން ކޯޕަރޭޝަން (އެފްޑީސީ) ގެ ފަރާތުންނެވެ. މި ފްލެޓުތަކުގެ މަސައްކަތް އެއްކޮށް ނިމޭނީ އަންނަ އަހަރުގެ މެދުތެރޭގަ އެވެ.
މި ފްލެޓް ޕްރޮޖެކްޓްގައި ހަދަނީ 17-18 ބުރީގެ 32 ޓަވަރެވެ. ކޮންމެ ޓަވަރެއްގެ ފްލޯއެއްގައި 8 އެޕާޓްމެންޓް ހުންނާނެ އެވެ. އޭގެ ތެރޭގައި ދެ ކޮޓަރީގެ 1،200 ފްލެޓާއި ތިން ކޮޓަރީގެ 2،800 ފްލެޓް ހިމެނެ އެވެ.