ޝަރީއަތް ނިމެންދެން ކ. މާފުށީ ޖަލުގައި ބަންދުކޮށްފައި ހުރި މީހަކު މިއަދު ނިޔާވެއްޖެ އެވެ.
މޯލްޑިވްސް ކަރެކްޝަނަލް ސާވިސްއިން ބުނީ ނިޔާވީ ށ. ފުނަދޫ ޒަމާނީވިލާ މުހައްމަދު ޖަމީލު، 45، ކަމަށެވެ.
އޭނަ އަކީ ނުރައްކާތެރި އަދި ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ މައްސަލައެއްގައި ޝަރީއަތް ނިމެންދެން ބަންދުކޮށްފައި ހުރި މީހެކެވެ. ޖަމީލަކީ ނަފުސާނީ ބައްޔަކަށް ފަރުވާ ވެސް ކުރަމުން އައި މީހެކެވެ.
ކަރެކްޝަންސް އިން ބުނީ އޭނަ ގޮޅިން ބޭރަށް ނުނިކުމެ، ހަރަކާތް ނުކޮތް ގިނައިރު އޮތްކަން ފާހަގަ ކުރެވިގެން ޖަލުގެ މެޑިކަލް ސެންޓަރަށް ގެންގޮސް ވަނީ ސީޕީއާރް ދީފައި ކަމަށެވެ. އަދި އެއްވެސް ބަދަލެއް ނައުމާ ގުޅިގެން މެންދުރު، 12:13 ހާއިރު މާފުށީ ސިއްޙީ މަރުކަޒަށް ގެންގޮސް އޭނާއަށް ފަރުވާ ދޭން ފެށު ކަމަށެވެ.
އަނި ހިތް ހުއްޓިގެން ޖަމީލު ނިޔާވީ ކަމަށް ކަނޑައެޅީ މެންދުރު 12:45 ގަ އެވެ.
އޭނަ ނިޔާވުމާ ގުޅިގެން ވަގުތުން އެކަން އޭނާގެ ޢާއިލާއަށާއި އިންސްޕެކްޓަ އޮފް ކަރެކްޝަނަލް ސާވިސްއަށާއި ފުލުހުންނާއި އެޗްއާރްސީއެމާއި ނެޝަނަލް އިންޓެގްރިޓީ ކޮމިޝަނަށް ވަނި އެކަން އަންގައިފަ އެވެ.