ދައުލަތުގެ ޙަރަދުތައް ކުޑަކުރުމަށްޓަކައި ރައްޔިތުންގެ މަޖިލީހުގެ މެންބަރުންގެ މުސާރަ އާއި އިނާޔާތްތައް ކުޑަކުރަން ތާއީދު ކުރައްވާ ކަމަށް މަޖިލީހުގެ ގަލޮޅު އުތުރު ދާއިރާގެ އެމްޑީޕީ މެމްބަރު މުހައްމަދު އިބްރާހިމް (ކުޑޫ) ވިދާޅުވެއްޖެ އެވެ.
އެކްސްގެ ޕޯސްޓެއްގައި އޭނަ ވިދާޅުވީ "މެމްބަރެއްގެ ގޮތުން ލިބޭ މުސާރައިގެ އިތުރުން އެހެނިހެން އިނާޔަތްތައް ކުޑަކުރަން ހަމަގައިމު ވެސް އަޅުގަނޑު މި ހުރީ ތައްޔާރަށް" ކަމަށެވެ.
ދައުލަތުގެ ޙަރަދުތައް ކުޑަކުރަން, މަޖިލިސް މެމްބަރެއްގެގޮތުން ލިބޭ މުސާރައިގެ އިތުރުން އެހެނިހެން އިނާޔަތްތައް ކުޑަކުރަން ހަމަގައިމުވެސް އަޅުގަނޑު މިހުރީ ތައްޔާރަށް.
— محمد كودو (@mohamedkudu) June 28, 2024
ހަދަރުތައް ކުޑަކުރަން ސަރުކާރުން މިހާރު ފިޔަވަޅުތަކެއް އަޅަމުން އަންނަ އިރު، މަޖިލީހުގެ އެކިއެކި މެންބަރުން އަންނަނީ އެކަމަށް ތާއީދު ކުރައްވާ ކަމަށް ވިދާޅުވަމުންނެވެ. އެގޮތުން މެންބަރުންގެ މުސާރަ އާއި އިނާޔަތްތައް ކުޑަކުރުމަކީ މި ދަނޑިވަޅުގައި މައްސަލައަކަށްވެގެން ނުވާނެ ކަމަށް ވިދާޅުވެ، އެކިއެކި މެންބަރުން ވާހަކަ ދައްކަވާފައިވެ އެވެ.
ސަރުކާރު ހިންގާ ޕާޓީ، ޕީއެންސީ އަށް ނިސްބަތްވާ ހިތަދޫ މެދު ދާއިރާގެ މެންބަރު އަހުމަދު އަޒާން ވެސް ވަނީ ހަރަދުތައް ކުޑަކުރުމަށްޓަކައި މެންބަރުންގެ ހެލްތު އިންޝުއަރެންސް ކަނޑާލަން ޖެހޭ ކަމަށް ވެސް ވިދާޅުވެފަ އެވެ.
ލައްކައަކާ ގާތްކުރާ ވަރުގެ ބޮޑު މުސާރައެއް ލިބޭ މަޖިލިސް މެންބަރުންނަކީ އަބަދު ވެސް ހާއްސަ އިމްތިޔާޒުތަކެއް ލިބިދޭ ބައެކެވެ. މިކަމާ ހެދި ރައްޔިތުންފެ ފާޑުކިޔުންތައް ވެސް މެންބަރުންނަށް އަމާޒުވެ އެވެ.
މިހާރު އޮތް 20 ވަނަ މަޖިލީހުގައި 93 މެންބަރުން ތިއްބަ އެވެ.